“Duke filluar nga konkursi i muajit Shkurt, infermierët ekselentë që konkurojnë për një vend pune në portalin “Infermierë për Shqipërinë” hyjnë në testim me 10 pikë bonus”. Deklarata u bë nga Ministrja Manastirliu gjatë bashkëbisedimit me studentët e fakulteteve të Mjekësisë, të zhvilluar me Kryeministrin Edi Rama, në bibliotekën e rehabilituar, në një nga konviktet e studenteve të Mjekësisë.
E pyetur pse studentët ekselentë nuk punësohen direkt nëpërmjet platformës punetembare.al, Manastirliu shpjegoi dallimet mes dy platformave:
“Kush aplikon në portalin infermierepershqiperine.al dhe është me mesatare 9-10, ka 10 pikë bonus në testim, ndërkohë që në portalin punetembare.al shpallen vendet e lira në administratë, jo në shërbim”, tha Manastirliu.
E pyetur në lidhje me praktikat mjekësore, Manastirliu u përgjigj:
“Po investojmë edhe për përmirësimin e infrastrukturës, në mënyrë që studentët të kryerjnë praktikat klinike në klasa dhe laboratorë modernë. Vetëm në spitalin e ri që po ndërtohet në QSUT, shtohen 10 klasa ku studentët mund të kryejnë praktikat mjekësore”, u shpreh Manastirliu.
Ministrja deklaroi se, në kuadër të paktit për universitetin, po vijojnë takimet me studentë dhe pedagogë, duke adresuar problematikat që shtrohen. Një prej tyre është marrja e licensës në afat më të shkurtër për studentët që diplomohen, gjë e cila po adresohet për zgjidhje, në kuadër të angazhimit që Ministria e Shëndetësisë dhe Mbrojtjes Sociale ka marrë për të patronazhuar Universitetin e Mjekësisë.
/a.meta
