“Kolë Manaj nuk e ka pranuar ndarjen nga Anila Ndoka dhe i ka dërguar më herët video ku dhe ka inskenuar vetëvrasjen e tij.”
Sipas korrespondentes së Klan News, Emi Kalaja, ka qenë kjo video që ka shtyrë Anilën që të takohet me Kolë Manajn për të sqaruar mbi situatën e krijuar. Ata janë takuar brenda automjetit të pronësi të Anila Ndokës disa metra larg vendit ku ajo punonte si punonjëse sociale në një qendër komunitare të Bashkisë Shkodër.
“Ajo e ka thirrur për ta sqaruar, si duket dhe për ta ndërgjegjësuar dhe kthjelluar, por mesa duket 34-vjeçari ishte i bindur për aktin fatal dhe mund ta ketë mirëmenduar pasi mund të mos jetë një konflikt i çastit apo i marrë në momente nxehtësie”, raporton Kalaja.
Teksa kanë kaluar më shumë se 24 orë nga ngjarja ku u plagos me plumb në kokë, 44-vjeçarja ndodhet në gjendje kritike për jetën.
Brenda kësaj periudhe, është tentuar 2 herë që Ndoka të dërgohet drejt Spitalit të Traumës në Tiranë, por sapo ka nisur transportimi i saj autoambulancat janë kthyer pas pasi ka rezultuar që parametrat jetësorë të jenë në zbritje. Nga frika se mund ta humbasin, e kanë rikthyer në repartin e reanimacionit në Spitalin Rajonal të Shkodrës.
Sipas mjekëve, duhen pritur 72 orë, të cilat janë vendimtare për të parashikuar nëse Anila Ndoka do të mund t’i mbijetojë plagosjes së rëndë në kokë. Ajo u qëllua nga bashkëjetuesi i saj, Kolë Manaj, i cili kreu vetëvrasje pasi aktit të rëndë.
Në 5 vite bashkëjetesë me 34-vjeçarin Manajn, Anila Ndoka nuk ju ka shprehur njerëzve të afërt se ka pasur probleme në raport me partnerin e saj, por thuhet se konfliktet mes të dyve kanë nisur 2 javët e fundit.
Sjellim në vëmendje se Anila Noka është nënë e 3 fëmijëve, përkatësisht, 20, 18 dhe 9 vjeç nga martesa e mëparshme.
