Partia Demokratike ka zhvilluar sot një takim me ekspertë të mjedisit dhe turizmit. Jamarbër Malltezi në fjalën tij gjatë këtij takimi është ndalur tek situata me zonat e mbrojtura dhe pyjet në vendin tonë. Sipas Malltezit, po prishet vija bregdetare e Vlorës, pasi “është zëvendësuar rëra me llucën, kinse do të ndërtonin Lungo Maren”.
Malltezi tha se në vendin tonë po bëhen ndërtime edhe në zona të mbrojtura, dhe sipas tij prej tyre po kërcënohet parku rinia dhe parku i liqenit.
“Kemi lajmet që temperaturat janë nën zero, por në parqet kombëtare digjen pyjet mes të ftohtit. Po flasin për moratorium për gjuetinë e paligjshme, por përsëri po bëhet nami. Asgjë konkrete për të ndërhyrë për të ndaluar këtë katastrofë. Nuk bëhet monitorim i ndotjes së ajrit, i cili është në nivele të larta”, tha Malltezi.
PD ka sugjeruar mbajtjen e referendumeve lokale, për të mos lejuar ndërtimet, sipas Malltezit “të dëmshme për mjedisit, duke theksuar se ato ndikojnë negativisht në shëndetin e qytetarëve.
“Ne sugjerojmë referendume lokale për të lejuar apo jo ndërtimet në zonat të caktuara. Jemi të gatshëm të organizojmë vetëm mbledhjen e firmave për çështje që na prekin, dhe dëmtojmë shëndetin tonë dhe të fëmijëve tanë”, tha Malltezi.
Më tej, Malltezi u ndal tek sektori i turizmit, duke u shprehur se për të nxitur këtë sektor duhet të ulen taksat, të cilat janë më të larta në rajon.
BW
