Një i ri 33-vjeçar humbi tragjikisht jetën mbrëmjen e kësaj të diele në Elbasan, pasi u përplas nga një automjet. Burime zyrtare të policisë bëjnë të ditur se ngjarja ndodhi në aksin rrugor Elbasan-Cërrik. Viktima po lëvizte në këmbë kur u përplas nga një makinë që drejtohej nga një 41-vjeçar.
Si pasojë e plagëve të marra, 33-vjeçari humbi jetën rrugës për në spital. Autoritetet shoqëruan në komisariat shoferin e automjetit, ndërsa vijojnë hetimet për zbardhjen e rrethanave të aksidentit të rëndë.
“Në aksin rrugor Elbasan-Cërrik, shtetasi O. H., 41 vjeç, banues në Belsh, duke drejtuar automjetin tip “BMW”, ka aksidentuar shtetasin N. B., 33 vjeç, banues në Cërrik, (këmbësor). Si pasojë shtetasi N. B., ka ndërruar jetë, gjatë transportimit me ambulancë. Drejtuesi i automjetit, shtetasi O. H. është shoqëruar në Komisariatin e Policisë për veprime të mëtejshme. Grupi hetimor ndodhet në vendngjarje dhe po punon për zbardhjen e rrethanave të aksidentit“, tha policia e Elbasanit në një njoftim paraprak për ngjarjen.
/a.r
