Makinat luksoze, skafet dhe jeta e natës duket se kanë qenë pasioni i 34-vjetarit, Gazmend Çollaku, i cili u rrëmbye pak ditë më parë në Durrës dhe më pas u ekzekutua në mënyrë mafioze.
Fotografitë e publikuara nga Gazmend Çollaku në faqen e tij në “Facebook”, tregojnë se ai bënte një jetë luksoze dhe nuk i mungonin makinat e shtrenjta, e mbrëmjet argëtuese në zonat vip të lokaleve të natës.
Sipas publikimeve të tij në rrjetet sociale dhe komentet e miqve të tij, duket se Çollaku i ndryshonte shumë shpesh makinat e shtrenjta. Ai kishte në pronësi edhe një skaf, ndërsa nuk i mungonin as aksesorët e shtrenjtë dhe veshjet firmato.
Gati dy javë pas rrëmbimit dhe vrasjes mafioze të Gazmend Çollakut, policia dhe prokuroria ende nuk kanë rënë në gjurmët e autorëve të krimit.
Ndonëse janë shoqëruar dhe marrë në pyetje rreth 70 persona, ende nuk ka një person të dyshuar për ekzekutimin e 34-vjeçarit nga Durrësi.
Sipas hetuesve, dyshohet që vrasja e Çollakut të ketë lidhje me atentatin e ndodhur më 20 dhjetor të vitit që shkoi tek Torra, ku u ekzekutuan dy të rinjtë Ervin Kodra dhe Endi Çaushaj, dhe se të dyja ngjarjet kanë lidhje me trafikun e drogës.
Dosja për ngjarjen e rëndë i është përcjellë Prokurorisë së Krimeve të Rënda në Tiranë.
Balkanweb
