Driton Kuka, trajneri i xhudistes Majlinda Kelmendi e cila nuk arriti të marrë medalje në Kampionatin Botëror, ka deklaruar se në përballjen e fundit kampionia olimpike ka pësuar lëndim. Kelmendi u mposht në gjysmëfinale nga japonezja Ai Shishime, ndërsa në luftën për të bronztën u mposht nga braziliania Erika Miranda.
Pas humbjes, Kuka ka shkruar se Kelmendi do të kthehet edhe më e fuqishme. “Majlinda sot fitoj 3 lufta dhe arriti në gjysmëfinale ku pësoi nga japonezja Shishime! Shpresoj që të mos jetë diç serioze por për medalje të bronztë pësoj humbje por edhe si duket u lëndua!
Vendi 5 në Botëror për Kampionen Tonë Olimpike, jo siç kam parapa që të fitoj medalje por sporti e ka kështu do kthehet Majlinda ashtu siç din edhe ma e fuqishme”, ka shkruar ai në Facebook.
Kuka po ashtu ka thënë se edhe xhudistja tjetër Distria Krasniqi do të nxjerrë rezultate më të mira në të ardhmen. Krasniqi doli në pozitën e shtatë në këtë kampionat.
“Distria për herë të parë pati kualifikim dhe u rendit e 7 që është kualifikim i mirë por Distria ka potencial për më shumë”, ka shtuar ai. Nesër në Botëror garojnë Nora dhe Akil Gjakova, përgatiti Koha. (b.an)
