Deputetja e Partisë Demokratike Majlinda Bregu vijon të jetë mjaft kritike për mënyrën se si po drejtohet sot selia blu nga Lulzim Basha. Ajo ka komentuar zhvillimet e fundit në partinë e saj në studion e Sokol Ballës në “Top Story”. Referuar kritikave që ajo vet ka marrë për qëndriomin ndaj kreut Basha, Bregu tha se ajo kurrë nuk e ka tradhtuar PD. Por ajo shtoi se PD sot nuk ofron shpresë te elektorati.
“Nuk e kam tradhtuar Partinë Demokratike edhe në kohët më të vështira. Një mesazh që kisha nga të gjithë mesazhet në Facebook ishte: Një djalë i ri thoshte. Unë do të votoj vitin tjetër, për kë do të votoj, unë nuk shoh shpresë”, tha Bregu.
Në lidhje me rezultatin e zgjedhjeve në Dibër ajo tha se PD duhet të shohë gabimet e veta dhe punën e dobët në fushatë.
“I gjithë grupi parlamentar u vendos 1 muaj në Dibër. Nuk ishte zgjedhja më e zgjuar. Rezultati jo vetëm nga blerja e votës dhe karteli i drogës. Nuk bie dakord nëse ne nuk kthejmë pasqyrën nga vetja”, tha më tej Bregu.
Më tej ajo kritikoi edhe gjendjen e strukturave të selisë blu në bazë. Sipas Bregut strukturat në të gjithë vendin janë problematike.
“Strukturat e Partisë Demokratike sot janë problematike në të gjithë Shqipërinë. Kjo situatë ishte edhe në Dibër. Degët tona kanë 3 vjet që shkojnë nga një palë zgjedhje në tjetrën”, tha deputetja demokrate.
Bregu zbuloi edhe votën e saj pro Sokol Olldashit në garën për kreun e PD 3 vite më parë. Ajo tha se atëherë ka vepruar drejtë dhe mendon se me Olldashin PD do ishte më e fortë.
“Votova Sokol Olldashin se mendoja se mund të ishte figura më e mir për të pasuar Sali Berishën. Votova atë se mendoja që do të ishte një kryetar shumë i mirë i PD. Nuk kam mundësi sot të jap provën e kësaj që them, po të ishte gjallë do të ishte prova e vërtetë nëse do kishim një PD ndryshe. Por ajo që po ndodh sot përvec humbjes së një miku, është një minus shumë i madh në PD. Unë besoj se kam bërë zgjedhjen e duhur në 2013-ën. Për miqësi dhe shok mund të kisha votuar edhe Lulëzim Bashën. Por asnjë nga ne nuk do bëhej shkopinj nën rrota për lidershipin e ri:, tha deputetja e PD.
Ajo komentoi edhe zërat që flasin për një koalicion të mundshëm me lëvizjen Socialiste për Integrim. Bregu dha edhe argumentat e saj pse është kundër kësaj aleance.
“Lëvizja Socilaiste për Integrim ëhstë një forcë e pozicionuar në qendër të politikës. Unë besoj se ne, me akuzat që kemi ngritur këto vite për qeverinë më të korruptuar, por edhe akuzat me të cilat dolëm me protesta në rrugë për të larguar Ilir Metën, nuk na jep pikë për një aleancë të re me Ilir Metën. Aleanca që duhet të besojë PD që do ndërtojë, është aleanca sa më e gjerë me qytetarët”, vijoi Bregu. /a.m.
