Ish-kryeministri Pandeli Majko ka marrë sot fjalën në Kongres ku është ndalur te çështja e votës së emigrantëve. Sipas Majkos, kjo është një çështje që duhet parë me prioritet. Deputeti socialist solli në vëmendje fluksin e votuesve që erdhën nga emigracioni vetëm për të marrë pjesë në zgjedhjet e vitit 2013.
“Në zgjedhjet e vitit 2013 mijëra emigrantë Shqiptarë, sidomos nga Greqia dhe Italia udhëtuan për të votuar. Imagjinoni dikë që udhëton drejt Atdheut për të votuar dhe kthehet sërish me bindjen që i ka shërbyer vendit. Të shmangim rutinën e qeverisjes dhe të mendojmë për ata që veç i japin këtij vendi dhe as nuk marrin e as nuk kërkojnë gjë prej tij. Kultura e tyre është perëndim dhe trajtimi i tyre na bën më të përgjegjshëm drejt BE” – tha Majko.
Ai theksoi se Partia Socialiste është një parti patriotësh dhe jo konsumuese e nacionalizmit.
“Nëse nuk do të vidhej vota, historia e Shqipërisë sot do të ishte ndryshme. Vota dhe drejtësia janë dy prioritete. Duhet të vendosim nëse jemi një vend që drejtohemi nga parimet europiane apo kumbari i radhës” – tha deputeti socialist. /javanews.al
