Pas përfundimit të dispozitës kalimtare të ligjit për statusin e gjyqtarëve dhe prokurorëve në RSH, procesi i pranimit të studentëve të Shkollës së Magjistraturës është futur në ngërç. Pavarësisht ligjit të propozuar nga deputetë të maxhorancës për të shtyrë afatin e pranimit edhe këtë vit, në parlament nuk u arrit konsensusi për votim duke vënë në rrezik fillimin e vitit akademik. Ora News ka pyetur zyrtarisht se cili është qëndrimi i delegacionit të BE për këtë ngërç të formuar mbi shkollën e Magjistraturës. Në përgjigje të pyetjes, delegacioni i BE në vendin tonë shprehet se:
“Formimi i gjykatësve dhe prokurorëve të rinj është më i rëndësishëm se kurrë, kur marrim parasysh se si pasojë e procesit të vettingut, një numër i caktuar gjykatësish dhe prokurorësh po shkarkohen nga detyra dhe duhet të zëvendësohen. Shprehim keqardhje që partitë politike në Shqipëri nuk arrijnë marrëveshje lidhur me ndryshimet e nevojshme në Ligjin për Statusin e Gjyqtarëve dhe Prokurorëve, lidhur me rekrutimin e kandidatëve për formimin fillestar gjatë vitit akademik 2018-19. “
Në lidhje me pyetjen se cila mund të jetë zgjidhja që duhet të gjëjnë partitë politikë në Shqiperi për të kaluar këtë situatë, delegacioni shprehet se:
“BE-ja i bën thirrje partive politike të tejkalojnë bllokimet dhe të amendojnë Ligjin, ose në një seancë të jashtëzakonshme, ose me përparësi kur Kuvendi të mblidhet përsëri në shtator.”
