Nënkryetarja e Parlamentit Evropian, Ulrike Lunaçek i bëri thirrje të premten Beogradit që të tërheqë akuzën e vjetruar kundër liderit të AAK-së dhe ish-kryeministrit të Kosovës Ramush Haradinaj, të cilin Serbia e akuzon përkrime lufte, ndërsa Prishtinës i bëri thirrje që të vazhdojë procesin e dialogut.
Duke reaguar ndaj rezolutës së djeshme të Kuvendit të Kosovës me të cilën kërkohet lirimi i pakusht i Haradinajt dhe ndërprerja e dialogut me Serbinë derisa kjo kërkesë të përmbushet, Lunaçek, në llogarinë e saj në Twitter ka shkruar se “Beogradi dhe Prishtina duhet të kthehen në tavolinën e bisedimeve dhe të vazhdojnë procesin e dialogut”.
Kuvendi i Kosovës ka miratuar dje me 78 vota pro dhe një kundër rezolutën për lirimin e pakusht të liderit të AAK-së dhe ish-kryeministrit të Kosovës Ramush Haradinaj, i cili po mbahet në Francë me kërkesë të Serbisë për krime lufte gjatë luftës në Kosovë. Përveç saj, kërkohet që dialogu ndërmjet Kosovës dhe Serbisë për normalizim të pezullohet deri në lirimin e Haradinajt dhe kthimin e tij në Kosovë./b.d
