Kreu i PD-së Lulzim Basha i ka kutjuar edhe njëherë Ramës sot nga mitingu në qendër të Tiranës, premtimet e pambajtura, sipas tij, për 300 mijë vende pune, taksa të ulëta, shëndetësi falas etj. Basha tha se tendera, koncesione, palma e fasada janë bilanci i Edi Ramës.
“Edi Rama shpalli kryengritjen kundër Republikës së vjetër dhe ka dalë në fushatë me dy gishta. Por në fakt republika e vjetër po vazhdon edhe disa ditë zakonin e saj. Po mundohet ta kthejë në shfaqje, në cirk këtë fushatë. Kanë 10 ditë që po flasin për kafshë në kopshtin zoologjik, me poture. Thotë pse mi shan poturet, unë s’kam punë me poturet e tua. Dua t’i them çdo shqiptari, mos u merrni me poturet e Ramës, pyeteni ku i ka 300 mijë vendet e punës që premtoi, taksat e ulëta, çmimin e energjisë, shëndetësinë falas, pensionin e 13-të, tarifat e ulëta për studentët, subvencionet për fermerët shqiptarë… Pyeteni për të gjitha këto dhe mos u merrni as me poturet dhe barsoletat por po ta pyesni për këto, jam i sigurt se do bëjë kollotumba në skenë vetëm që të mos përgjigjet. Me çfarë mbylli Edi Rama mandatin me 350 mijë tenderë për miqtë. Me 400 mln euro palma dhe fasada Rilindje urbane. Ky është bilanci i Edi Ramës”, deklaroi Basha.
Ai tha se kryeministri ‘e kishte kohën, pushtetin por vendosi të mos mbajë asnjë premtim sepse Shqipëria për të nuk janë njerëzit, as hallet tuaja të përditshme’. “Shqipëria për të është një skenë e madhe ku ka vënë në shfaqje veten, vetë aktor vetë regjisor. Shqipëria për të janë pikturat dhe qypat me baltë se merret dhe me qypa tani”, tha Basha.
E duke iu kthyer sërish replikave për timonin, Basha tha se Rama ia dogji motorin, ekonominë dhe tani nuk do të bëjë duart pis, por se ai është gati t’i fusë duart tek motori për zhvillimin e ekonomisë.
“Nuk duhet patentë, nuk ka makinë, i ka ngelur timoni. Motorin ia dogji, ekonominë e shkatërroi, llamarina i ra në lumë. Makina s’ka motor por për të s’ka rëndësi fare, ëndrra e tij është të rrijë në timon. Një djali 4-vjeçar edhe i falet, por për një burrë të rritur ky është vanitet, ego e sëmurë. Nuk do të bëjë duart pis, do të merret me fasadat. Kjo merr fund më 25 qershor. Sepse Lulzim Basha do t’i fusë duart tek motori ekonomia, di si ta bëj, dua të bëj, kam përvojën, vullnetin, vendosmërinë dhe do ta bëjmë së bashku ekonominë shqiptare konkurruese, të zhvilluar”, tha Basha.
Ai paralajmëroi gjithashtu anulimin e koncesioneve dhe të ligjit të arsimit të lartë.
“Këto koncesione do anulohen që në ditën e parë, paratë do shkojnë për mjekë, ilaçe, për spitalet. Edhe ligjin për arsimin e parë do ta ndryshojmë që ditën e parë, kemi gati tjetrin”, tha Basha.
ma.me
