Presidenti bjellorus, Alexandre Lukashenko refuzoi ftesën e Brukselit për të marrë pjesë në samitin mes BE-së dhe vendeve të Partneritetit lindor, ku ai u ftua për herë të parë që prej heqjes së sanksioneve kundër vendit të tij, njoftoi Minsku.
Gjatë këtij samiti që mbledh krerët e shteteve dhe kryeministrat e vendeve të BE-së dhe gjashtë vendeve të Partneritetit lindor (Ukrainë, Bjellorusi, Armeni, Azerbajxhan, Gjeorgji dhe Moldavi), Bjellorusia do të jetë e përfaqësuar nga shefi i diplomacisë, Vladimir Makei, njoftoi Ministria e Punëve të Jashtme në një komunikatë.
“Ishte hera e parë që një ftesë i ishte dërguar drejtpërdrejt presidentit, Lukashenko”, deklaroi një zyrtar evropian.
“Ai nuk ishte ftuar në samitet e mëparshme sepse ishte në listën e sanksioneve të Bashkimit Evropian. Këto sanksione janë hequr”, shtoi ai.
Në një komunikatë, diplomacia bjelloruse nënvizoi se kjo ftesë reflekton progres në marrëdhëniet mes Bjellorusisë dhe BE-së pas një periudhe të gjatë mosmarrëveshjesh./b.d
