Luis Enrike vlerëson maksimalisht forcën e Juventusit, para ndeshjes së sotme në Torino. I pyetur mbi faktin që kundërshtari italian ka pësuar vetëm dy gola në Champions këtë edicion, tekniku i Barcelonës tha:
“Duhet të luajmë futboll cilësor, pasi statistikat e Juventusit janë të jashtëzakonshme. Ata janë në maksimumin e historisë së tyre, sa i përket nivelit të forcës si skuadër. Mendoj se në çdo repart janë të kompletuar dhe kanë futbollistë të shkëlqyer. Takimi i parë ka shumë rëndësi dhe ndaj duhet të jemi të kujdesshëm”.
Më tej, Enrike u pyet edhe për krahasimin midis Juventusit që luajti në finalen e dy viteve më parë. “Nuk mund të them se sa ka ndryshuar, pasi shumë futbollistë janë të ngjashëm. Diferencën mund ta bëjë më mirë trajneri i tyre. Por, ju garantoj se nuk janë aspak më të dobët”.
PSG-ja
“Nuk duhet të përdoret si një element referues ajo përmbysje, pasi mund të ndikojë negativisht. Arritëm një përmbysje që do mbahet mend gjatë, por nuk na dha asnjë trofe. Çdo sfidë dhe çdo kundërshtar ka specifikën e saj”.
Humbja
“Ishte një rezultat i pamerituar dhe nuk duhet të konsiderohet diçka shqetësuese. Ne luajtëm shumë mirë, dominuam ndjeshëm, patëm raste të pastra. Kjo më jep besim që lojtarët do paraqiten mjaft mirë në Champions. I vetmi element që na bën të kemi keqardhje, është fakti se ndaj Malagës nuk morëm asnjë pikë”.
Formacioni
“Mos prisni t’jua zbuloj para një ndeshjeje të tillë. Por, njëkohësisht, jam i vetëdijshëm që shumica e lojtarëve që do zbresin nga minuta e parë janë të parashikueshëm. Nuk do ketë eksperiment dhe kjo është e sigurt”./b.d
