Asociacioni i Komunave me shumicë shqiptare, që themelohet sot në Preshevë, do të jetë i ngjashëm me atë të serbëve në Kosovë, ndërsa sipas përfaqësuesve nga Lugina, Asociacioni shqiptar ka marrë mbështetje nga Kosova dhe Shqipëria
‘Zeri.info’ shkruan se tri partitë politike shqiptare, që kanë numrin më të madh të këshilltarëve nëpër kuvendet komunale të Preshevës, Bujanocit e Medvegjës, kanë vendosur për ta themeluar sot në Preshevë në ora 11, Asociacionin e Komunave me shumicë shqiptare në Serbi. Ky Asociacion do të jetë i ngjashëm për nga përmbajtja dhe fuqia me atë që do ta themelojnë serbët në Kosovë, ndërsa, sipas përfaqësuesve nga Lugina e Preshevës, Asociacioni shqiptar ka mbështetjen e Kosovës dhe të Shqipërisë.
Mirëpo, ende pa u konkretizuar është partia e Riza Halimit, PVD, që ka shprehur dyshim në seriozitetin e këtij Asociacioni, derisa analistët dyshojnë në sinqeritetin e Prishtinës dhe të Tiranës për t’i dalë në krah Luginës.
