Nga Ardit Rada/
Debati i vonuar dhe tashmë i pavlerë për emrin e stadiumit kombëtar të futbollit, ka prodhuar megjithatë një dozë jo të vogël hipokrizie dhe gjoja-keqardhjeje, edhe nga ajo pjesë e klasës politike që ka pasur në dorë të thotë shumë kohë më parë diçka për këtë temë, por që ka preferuar të heshtë. I tillë është zv.kryeministri Erion Braçe, i cili është përfshirë këto javë në një debat publik për ruajtjen e emrit “Qemal Stafa” për stadiumin tonë të ri kombëtar, paçka se tashmë kanë nisur procedurat për gjetjen e një emri tregëtar për këtë objekt sportiv.
Le ta themi qysh në krye se heqja e emrit “Qemal Stafa” nga stadiumi kombëtar i futbollit është një gjest i debatueshëm. Figura e Qemal Stafës dhe fakti që ai mbetet një simbol i luftës, i papërlyer me asnjë prej zhvillimeve që pasuan pas viti ’44, e bën atë një simbol, më shumë sesa një funksionar apo politikan komunist. Megjithatë tashmë duket se emri i stadiumit kombëtar të futbollit do të ndryshojë, e kjo s’ka marrë udhë sot, por kohë më parë.
Ka nisur qyshse kryeministri Rama dhe kreu i FSHF Duka prezantuan para shqiptarëve maketin e stadiumit, duke e pagëzuar atë me emrin “Arena Kombëtare”. Nuk dimë të jetë regjistruar asokohe ndonjë betejë publike verbale e zotit Braçe, në lidhje me këtë gjest të Kryeministrit dhe qeverisë e Federatës së Futbollit. Kujtojmë se në atë kohë edhe shkallët e vjetra të stadiumit quheshin gërmadha të pavlera e mezi u arrit të konservoheshin.
Beteja e sotme e Erion Braçes për emrin e stadiumit është një gjest i pastër hipokrit, sepse është selektiv dhe i vonuar. Është selektiv sepse nuk u drejtua kundër emrit të parë me të cilin u pagëzua stadiumi, por kundër emrit të dytë. Është një gjest i vonuar sepse Erion Braçe di më mirë se kushdo tjetër se stadiumit kombëtar i futbollit nuk do ta mbajë më emrin “Qemal Stafa”.
Ai po bën thjesht një operacion kozmetik të majtë, për të nxitur simpatinë e asaj pjese të të majtës shqiptare, që e sheh këtë proces ndryshimi emrash, si një thikë në ije ndaj trashëgimisë së luftës dhe të kujtimit të figurave të rëndësishme të së shkuarës. Nëse ky është një gjest i vogël për t’u lëvduar, në funksion të taktikës politike të zv.kryeministrit, është gjithaq i shëmtuar në funksion të së vërtetës në lidhje me historinë e emrit të stadiumit.
Zv.kryeministri i një qeverie nuk mund të dalë kundër politikave dhe veprimeve të qeverisë së tij. Me të drejtë Rama e konsideron stadiumin e ri që po ndërtohet, si një vepër arkitektonike për t’u pasur zili. Stadiumi i ri, ciliod qoftë emri që do të mbajë, është vërtet një vepër e bukur sportive, e ndërtuar me cilësi dhe hijeshi. Sa për emrin, për të duhej debatuar, luftuar e sherrosur më parë. që në momentin që u vu kazma e parë mbi objektin e vjetër. Tani beteja është thjesht politike dhe ka formën e një akti manipulativ, më shumë sesa të një preokupimi për trashëgiminë e figurave të luftës. Emrin “Qemal Stafës” nuk po ja heq Berisha apo Basha, zoti Braçe.
