Barcelona vazhdon të kryesojë kampionatin spanjoll, por tani vetëm falë rezultateve më të mira në përballjet direkt me Atletico Madrid. Humbja tronditëse mbrëmë me Valencian në shtëpi bëri që dy skuadrat të barazohen me pikë, pasi madrilenët kishin fituar pak orë më parë 3-0 kundër Granadës. Vetëm një pikë më poshtë është Real Madrid, i pashpresë deri dy javë më parë, por që i dha udhës krizës së Barcelonës me fitoren në Camp Nou.
Tani kanë mbetur edhe pesë javë, po kush e ka kalendarin më të vështirë deri në fund?
Që të treja skuadrat do të dalin në fushë të mërkurën në mbrëmje. Në 20:00, Barcelona luan në Riazor me Deportivo La Coruna, ndërsa 45 minuta më vonë Atletico Madrid e Athletic Bilbao nisin takimin në Estadio San Mames. Në 22:00, Real Madrid pret Villarreal në Bernabeu. Tri ndeshje shumë të vështira dhe ndoshta Real favorizohet ngaqë luan brenda, ndonëse Villarreal është kockë e fortë.
Në katër ndeshjet që mbeten më pas, Atletico ka avantazhin se luan tri herë brenda, ndërsa Barcelona dy. Realit i mbetet vetëm një ndeshje në shtëpi.
Ja dhe pesë ndeshjet e mbetura:
Barcelona: Deportivo (jashtë), Sporting Gijon (brenda), Real Betis (jashtë), Espanyol (brenda), Granada (jashtë).
Atletico Madrid: Athletic Bilbao (jashtë), Malaga (brenda), Rayo Vallecano (brenda), Levante (jashtë), Celta Vigo (brenda).
Real Madrid: Villarreal (brenda), Rayo Vallecano (jashtë), Real Sociedad (jashtë), Valencia (brenda), Deportivo (jashtë).
