Bisedimet mes delegacioneve amerikane dhe kineze në Madrid të Spanjës për çështjet tregtare, tarifat dhe veçanërisht TikTok duket se kanë shkuar shumë mirë.
Këtë e konfirmoi edhe vetë presidenti amerikan Donald Trump me një reagim të shkurtër, informojnë mediat ndërkombëtare.
“Kemi arritur një marrëveshje, do të takohemi me Xi të premten”, ishte njoftimi i kreut të Shtëpisë së Bardhë.
Dita e dytë e negociatave në Madrid midis SHBA-së dhe Kinës duket se ka arritur dakordësinë për çështjen e rrjetit social aq shumë të përfolur dhe që ka të paktën 170 milionë përdorues në SHBA. Lajmin e konfirmon edhe “Reuters”.
Moratoriumi për ndalimin e aplikacionit kinez skadonte pas dy ditësh. Por detajet e marrëveshjes nuk bëhen ende publike.
Bisedimet tregtare SHBA-Kinë dhe arritjen e marrëveshjes për TikTok e konfirmoi edhe kreu i delegacionit amerikan në takimin e Madridit.
Scott Bessent, Sekretar i Thesarit të SHBA dhe përfaqësues i Tregtisë, tha se “është arritur korniza e marrëveshjes në TikTok”.
“SHBA-të dhe Kina arritën një marrëveshje kornizë mbi aplikacionin e videove të shkurtra TikTok, si pjesë e bisedimeve më të gjera mbi tarifat dhe politikën ekonomike që përfunduan në Madrid të hënën”, tha Sekretari i Thesarit i SHBA-së, Scott Bessent.
Një marrëveshje do t’i lejonte TikTok të vazhdonte të operonte në Shtetet e Bashkuara, ku është përballur me mbylljen që më 17 shtator, nëse nuk kalon në pronësi të SHBA-së.
“Korniza është për një kalim në një pronësi të kontrolluar nga SHBA-të”, u tha Bessent gazetarëve në Madrid, në përfundim të dy ditëve bisedime, pa dhënë detaje të mëtejshme.
