Reagimi i sotëm i Presidentit, Bujar Nishani, ndaj kryeministrit, Edi Rama, jo vetëm shpreh një gjendje nervoze të kreut të shtetit, i cili qartazi tashmë është pozicionuar politikisht, ndonëse duhej të ishte mbi palët, por nga ana tjetër ajo që vihet re është se deklaratat e tij janë edhe më të ashpra se të vetë Kryetarit të PD-së, Lulzim Basha. Sa i përket nervozizmit kjo ka një shpjegim shumë të thjeshtë. Kreu i shtetit u përpoq të udhëhiqte një betejë politike në emër të sigurisë kombëtare mbi të ashtëquajturën “aferë përgjimesh”. Aq shumë u investua sa vërtetë mendonte se po e dërrmonte mazhorancën, meqë i kishte ardhur “guri në dorë” nga një fjalë veshi e shefit të SHISH.
Por pozita e tij u bë fare e palezetshme pas reagimit të policis italiane duke përgënjeshtruar qartazi të gjitha spekulimet e Nishanit dhe krerëve të PD-së mbi të ashtëquajturën “aferë përgjimesh”. Por po të lexosh me vëmendje reagimin e tij të sotëm ndaj kryeministrit Rama, duke e akuzuar se ka bllokuar Reformën në Drejtësi, se ka shkatërruar ekonominë, se ka shkatërruar sistemin shëndetësor etj., kupton qartë se beteja në realitet e Nishanit nuk është me Ramën, por me fatin e tij të ardhshëm politik pasi të dalë nga Presidenca. Qartazi kuptohet se Basha tashmë e ka një rival për postin e kryetarit të PD-së.
Duke lexuar me vëmendje reagimin e Presidentit, kupton qartë se ai e ka kuptuar se e ka humbur tashmë davanë për një mandate të dytë në krye të presidencës, dhe tashmë po përpiqet t’i hapë vetes rrugën për të kapur postin e kreut të PD-së. Për këtë mjafton të sjellim si shembull faktin se një lëvizje të tilë shumë kohë më parë e ka bërë dhe ish- Presidenti Berisha, i cili pasi la postin e Presidentit, detyroi Tritan Shehun të jepte dorëheqje si kryetar i PD-së për ta zëvendësuar atë me veten. Një President u përmbahet detyrimeve të tij kushtetuese për të qenë mbi palët, për të qenë bashkëpunëtorë dhe natyrisht për të ruajtur profilin e Presidencës për të mos e kthyer të në një zyrë shtesë të PD-së. Është e qartë tashmë se Nishani nuk e ka me qeverinë. Por me vetë Bashën. Siç është bërë zakon tani në PD kush shanë më shumë Ramën ka shanse për të bërë karrierë. Këtë Nishani e di mirë. Ndaj e ka ngritur zërin aq lartë jo shumë për ta dëgjuar Rama, por për ta dëgjuar vetë Basha
