Hetuesit e Kombeve të Bashkuara kanë lëshuar një deklaratë alarmante, me të cilën paralajmërojnë botën se në Jemen po zhvillohet “një nga katastrofat më të mëdha humanitare”, raporton Reuters. Më shumë se 21 milionë banorë të Jemenit jetojnë nën nivelin e varfërisë, të shkëputur nga bota dhe në pamundësi të marrjes së ndihmave humanitare, transmeton Telegrafi. Kreu i ekipit humanitar të OKB-së, Stephen O’Brien, ka deklaruar se Jemi ka nevojë për ndihmë, dhe ka akuzuar Arabinë Saudite se me bombardimet e saj disa mujore, po i pamundëson OKB-së të shpërndajë ndihma humanitare për popullatën. “Që nga marsi i vitit 2015 kur Arabia Saudite filloi bombardimet, janë vrarë më shumë se 6.000 njerëz, duke përfshirë 700 fëmijë. Të paktën 7.6 milionë njerëz nuk kanë asgjë për të ngrënë, kurse më shumë se 3.4 milionë fëmijë nuk shkojnë në shkollë. Përveç kësaj, sauditët nuk po i ndalin sulmet ajrore”, ka deklaruar O’Brien.
