Prokuroria e Posaçme kundër Korrupsionit dhe Krimit të Organizuar (SPAK) ka nënshkruar pesë memorandume mirëkuptimi me prokuroritë e Brazilit, Kilit, Kolumbisë, Republikës Domenikane dhe Paraguajit. Kjo vjen në kuadër të një takimi të nivelit të lartë të zhvilluar më 2–3 dhjetor në selinë e EUROJUST-it në Hagë.
Drejtuesi i SPAK, Altin Dumani, së bashku me prokuroren Dorina Bejko, morën pjesë në takimin ku u mblodhën përfaqësues nga katër vende të Ballkanit Perëndimor dhe 11 vende të Amerikës Latine. Gjatë fjalës së tij, Dumani u shpreh se bashkëpunimi ndërkombëtar dhe shkëmbimi i shpejtë i informacionit janë thelbësorë në luftën kundër krimit të organizuar.
“SPAK ka kaluar nga një agjenci që kryesisht merrte informacion, në një institucion që furnizon partnerët ndërkombëtarë me të dhëna të verifikuara dhe operacionale, duke u shndërruar në një kontribues të vërtetë të sigurisë”, deklaroi Dumani.
Gjatë aktivitetit, Dumani zhvilloi edhe takime bilaterale me homologë nga Paraguaji, Peruja, Kili, Brazili, Kolumbia, Republika Domenikane dhe Ekuadori, me fokus luftimin e trafikut të narkotikëve dhe grupeve kriminale .
Ky takim u zhvillua në kuadër të një eventi më të gjerë tre-ditor me përfaqësues nga Bashkimi Europian, Ballkani Perëndimor, Amerika Latine, Lindja e Mesme dhe Afrika e Veriut, me synimin e forcimit të bashkëpunimit mes rajoneve në luftën kundër krimit të organizuar.
