Është fundi i një epoke në lagjen e varfër të Marsejës, ku pallati në të cilin Zinedine Zidane kaloi fëmijërinë e tij do të shembet në kuadër të një projekti investimesh të qeverisë franceze për të luftuar krimin në këtë qytet.
Bëhet fjalë për lagjen Cite de la Castellane, një bllok ndërtesash prej çimentoje, e mirënjohur për kuotën e lartë të kriminalitetit, trafikut të drogës dhe papunësisë.
Shembja e ndërtesës G, ku është rritur ish-ylli i “gjelave”, do të shënojë nisjen e një projekti të gjerë restaurimi. Në Castellane jetojnë rreth 7 mijë banorë të shpërndarë në 1.250 banesa, prej kohësh të lënë në mëshirën e harresës.
Por zona është edhe një labirint ku me zor hyjnë forcat e policisë, të angazhuara çdo ditë në luftën kundër drogës dhe luftës së përgjakshme mes bandave.
Shembja e pallatit G ku është rritur ylli i futbollit do të pasohet nga shembja e kullës K, e përbërë nga 97 vendbanime dhe prej kohësh në duart e trafikantëve dhe shpërndarësve të drogës.
Në qytetin e Marsejës, në jug të Francës, bota e krimit kontrollohet kryesisht nga klane kriminale vendase, me origjinë italiane, si dhe grupet e përbëra nga emigrantë nga Afrika, Lindja e Mesme dhe vendet arabe.
/ Top Channel
