Presidenti i Turqisë Recep Tayyip Erdogan ka nisur Fushatën Kombëtare të Solidaritetit për të ndihmuar në luftën kundër COVID-19, duke dhuruar shtatë muaj të pagës së tij për iniciativën.
“Unë po e filloj fushatën personalisht duke dhuruar pagën time të shtatë muajve”, tha Erdogan në fjalimin e tij para popullit.
Ndër të tjera ai theksoi se anëtarët e kabinetit në qeveri dhe ligjvënësit po ashtu kanë dhuruar afro 791 mijë dollarë në fushatë.
Presidenti turk sërish është shprehur me shumë vetbesim duke shpjeguar se Turqia gëzon pajisje më të mira mjekësore në krahasim me vendet e tjera kundër virusit.
“Turqia po hap me shpejtësi spitale të reja përderisa po ashtu forcon ato ekzistuese. Ne jemi të vendosur të përdorim të gjitha mjetet për të frenuar përhapjen e koronavirusit”, tha presidenti turk.
Ne raportimin e fundit Ministria e Shëndetësisë e Turqisë njoftoi se në 24 orët e fundit janë regjistruar 37 raste të reja të vdekjeve nga koronavirusi, duke e çuar numrin e përgjithshëm të vdekjeve në vend në 168.
Në Turqi janë konfirmuar 10.827 raste me Covid-19, nga të cilat 1.610 janë konfirmuar vetëm në 24 orët e fundit.
g.kosovari
