Pas konfirmimit të aktakuzave për Thaçin e Veselin, kryeministri i Kosovës, Avdullah Hoti, thirri në një mbledhje qeverinë. Hoti tha se Kosova është përballur me sprova të shumta gjatë historisë së saj.
Aktakuzat ndaj ish-udhëheqësve të UÇK-së Hoti e sheh si një tjetër sprovë për vendin.
“Si shumë herë më parë, gjatë historisë sonë jemi përballur me sprova, kapërcimi i të cilave dëshmon pjekurinë tonë shtetërore. Zhvillimet e fundit si rezultat i konfirmimit të aktakuzave, ndaj një pjese të ish-udhëheqësve të UÇK-së, në mesin e të cilëve edhe Presidenti Hashim Thaçi, ish-kryetarët e Kuvendit, Jakup Krasniqi dhe Kadri Veseli, si dhe Rexhep Selimi; të gjitha këto zhvillime e kanë vënë edhe njëherë shtetin në sprovë”.
Hoti përshëndeti qëndrimin institucional që mbajtën Thaçi e Veseli dhe tha se mbarimi i këtij procesi do të ridëshmojë se lufta e Kosovës për liri dhe pavarësi ka qenë e drejtë dhe e pastër.
“Përshëndes qëndrimin dhe kulturën e tyre institucionale, e cila dëshmon edhe njëherë se Republika e Kosovës i beson drejtësisë dhe bashkëpunon me të pa asnjë hezitim. Duke uruar që puna e institucioneve të drejtësisë të udhëhiqet vetëm nga profesionalizimi, ne besojmë që mbarimi i këtij procesi do të ridëshmojë se lufta e popullit të Kosovës për liri dhe pavarësi ka qenë e drejtë dhe e pastër”, është shprehur Hoti.
/a.r
