Lufta ndaj informalitetit ka qenë një prej prioriteteve të qeverisë së drejtuar nga kryeministri Edi Rama në 4 vitet e shkuara por edhe në mandatin e ri qeverisës. Aksioni i madh i ndërmarrë rreth 3 vite më parë në terren nga tatimorët dhe strukturat e tjera ligjzbatuese, ka vijuar në mënyrë konstante edhe pse, larg trumbetimit mediatik siç ndodhte në fillimet e aksionit.
Sektori kundër krimit ekonomik në Policinë e Shtetit, ka vijuar me procedimin e pronarëve të bizneseve që i shmangen pagimit të taksave duke përdorur metoda të ndryshme, apo atyre që mbajnë punonjës të pasiguruar shkruan JavaNews. Çdo ditë policia raporton raste të shumta në të gjithë vendin ku procedohen subjekte të ndryshme. Kryesisht, rastet më të shumta raportohen në Tiranë, që përbën edhe tregun kryesor të vendit.
Me gjithë aksionet e ndërmarra, ndër subjektet më problematikë janë lokalet që mbajnë punonjës të pasiguruar si dhe nuk lëshojnë kuponin tatimor. Pas sinjalizimeve nga tatimorët, policia ka kryer kontrolle në shumë biznese, ndërsa një pjesë e mirë e kontrolleve vijnë pas denoncimeve nga punonjësit e pasiguruar shkruan JavaNews. Me dhjetëra raste procedohen nga policia çdo ditë, ndërkohë vetëm në Tiranë, 24 orët e fundit Sektori Kundër Krimit Ekonomik referoi materialet në prokurori për 4 pronarë biznesesh të cilët u gjetën me punonjës të pasiguruar.
‘Maskimi’ përmes kuponëve falsë
Të gjendur nën monitorimin konstant të tatimorëve, duket se bizneset po shfrytëzojnë hapësira dhe mtoda të ndryshme për t’i shpëtuar taksave. Moslëshimi i kuponit tatimor është një prej metodave, e cila i kushton shumë financave të shtetit bëjnë me dije burime për JavaNews në Policinë e Shtetit. Por kjo metodë është shpesh herë lehtësisht e zbulueshme pasi subjektet nuk mund të shpëtojnë përballë denoncimeve apo edhe kontrolleve të befta në terren nga inspektorët. Policia ka zbuluar një metodë të re se si bizneset i shmangen lëshimit të kuponëve.
Nga kontrollet e kryera në disa biznese, rezulton se shumë prej tyre, përdorin printera për nxjerrjen e kuponëve jo-fiskalë. Pra, në aktiviteitn e tyre këto biznese lëshojnë kuponë, por nuk janë të regjistruar te tatimet dhe rrjedhimisht shmangin detyrimet shkruan JavaNews. Lëshimi i këtyre kuponëve bëhet për të shmangur denoncimet, por me sa duket edhe kjo skemë e re ëhstë zbuluar tashmë nga policia. Raste të tilla zbulohen çdo ditë nga uniformat blu me sinjalizimin e tatimorëve. Vetëm 24 orët e fundit janë proçeduar të paktën pronarët e 3 subjekteve. Ndërkohë raportohet se kontrollet po shtohen dita-ditës/JavaNews/Andi Malasi
