Bujar Luca është një piktor që 25 vjet më parë udhëtoi drejt Parisit, bashkë me një piktor tjetër të ri shqiptar, Edi Ramën.
Më vonë rrugët e tyre u ndanë, Edi Rama u kthye në politikën shqiptare, kurse Luca vazhdoi të jetë piktor.
Së fundmi ai ka hapur një ekspozitë në Galerinë Kombëtare të Arteve, shkruan “Shqiptarja.com”.
A është e vërtetë ajo që thoshte dikur ish-kryeministri Fatos Nano se ai e mori Edi Ramën nga Parisi “me thonj të prerë, një njeri që shiste ikona të vjedhura”.
“Nuk është e vërtetë. Edi Rama ishte thjesht një artist në Paris. Nëse një politikan e quan artistin të mjerë, është problemi i tij. Ai nuk ishte në gjendje të mjerë. Ai zgjodhi kthimin për arsye individuale, siç janë kthyer shumë të tjerë. Nëse e ka pasur fjalën se ai ishte në gjendje modeste ekonomike, siç është çdo artist, kjo varet si e koncepton ai artistin, por nuk mund të thuhet se një artist është në gjendje të mjerë, sepse artisti nga natyra e zgjedh vetë mënyrën e jetesës.
Unë kam zbuluar në fakt tek Edi Rama një karakter shumë shoqëror dhe një karakter tjetër, që prirej nga dëshira për të komunikuar forcën e tij dhe për ta ndarë me të tjerët.
Edi Rama nuk ishte aq i varfër, sa të pengohej për të zgjedhur cilën rrugë të donte në atë kohë. Unë mendoj se zgjodhi rrugën e duhur,” thotë Luca.
“Madje kur ishim në Paris me Edi Ramën, ne mundoheshim t’i sqaronim njerëzit e tjerë që vinin atje nga Shqipëria, se vërtet është mirë të vish në Paris, por është kjo e kjo lloj pengese. Dhe kishte raste që u thoshim disa të afërmve se është mirë të kthehen në Shqipëri, saqë njëri nga të afërmit më tha: More ti ike se nuk e doje komunizmin apo se je komunist?!”.
Shqiptarja.com
