Ambasadori i SHBA-ve Donald Lu ka takuar këtë të martë ish Kryeministrin Sali Berisha, me të cilin ka diskutuar në lidhje me reformën në drejtësi dhe procesin në të cilin ajo ndodhet. Sipas njoftimit të bërë nga zyra e Berishës, Ambasadori Lu e njohu ish kryeministrin me rëndësinë shumë të madhe që qeveria e Shteteve të Bashkuara i kushton reformës në drejtësi si dhe punën që kanë bërë deri më tani ekspertët e saj.
Berisha nga ana e tij tha se opozita është forca politike më e interesuar për reformën pasi sipas ish kryeministrit, Edi Rama ka bërë gjithçka ka pasur në dorë që të largojë opozitën nga procesi.
Po sipas njoftimit të zyrës së ish kryeministrit, Berisha ka shprehur besimin se nëse eksziton vullneti politik i sinqertë, reforma do të votohet me konsensus të plotë.
Në takim u diskutua gjerësisht mbi gjendjen e kriminalitetit në vend. Berisha theksoi se lidhjet e Ramës me krimin, vrasësit dhe bandat, janë një problem tmerrësisht shqetësues për opozitën dhe vendin.
“Rasti Arben Frrokut është një dëshmi tjetër e lidhjeve të fuqishme të Ramës dhe qeverisë së tij me krimin ndaj dhe ndihma e SHBA-ve në problemet e dekriminalizimit është e një rëndësie shumë të madhe”, u shpreh Berisha.
Takimi është mbajtur në vazhdën e turit të takimeve të ambasadorëve të BE dhe SHBA me partitë politike për reformën në drejtësi. javanews/a.k
