UPDATE/ Pas takimit me aleatët e PD-së, kryedemokrati Lulzim Basha ka pritur në selinë blu ambasadorin e SHBA-së Donald Lu. Basha dhe Lu besohet se do të diskutojnë në lidhje me qëndrimet e fundit të opozitës në lidhje me kuvendin. Një tjetër pikë e diskutimeve pritet të jetë reforman në drejtësi.
…….
Ora 12:00 Lideri i opozitës tha pas takimit të tij me aleatët se në fokus të diskutimeve kanë qenë 3 pika kyçe, institucionalizimi i tryezës së opozitës, zbatimi i dekriminalizimit dhe garantimi i një procesi të lirë zgjedhor.
Këto ishin dhe 3 pikat, nga të cilat “dy kushte” që Basha bëri publike drejtuar maxhorancës, kur tha se dekriminalizimi duhet zbatuar nga “aleanca e krimit” dhe se zgjedhjet e lira dhe të ndershme janë një pikë kyçe për demokracinë e vendit.
“Janë tre vendimet kryesore të tryezës së opozitës. Dua të komunikoj sot institucionalizimin e tryezës së opozitës, do i paraprijmë procesit të zgjedhjeve. Unifikuam qëndrimet tona për zbatimin e ligjit të dekriminalizimit, duhet miratuar urgjent për stabilitetin politik. Në kushtet kur banditët me mandat deputeti në gjirin e shumicës përbëjnë një rrezik të përditshëm. Si dhe garantimi i një procesi të lirë dhe të ndershëm zgjedhor…. Reforma në drejtësi është diskutuar, është një ndër prioritetet por dekriminalizimi dhe zgjedhjet e lira janë prioritete kryesore. Aleanca e krimit ka përballë një aleancë opozitare që vjen duke u zgjeruar dhe e thekson prioritetin e gjithë prioriteteve procesin e zgjedhjeve të lira dhe të ndershme. Sot kemi dalë me kushte të qarta, të firmosura nga cdo parti që është në aksionin opozitar, me të tjerë jemi në dialog e bashkëpunim që presim të jenë pjesë e këtij koalcioni opozitar, që ka marrë përsipër një detyrë me një 97 pa plumba në një Shqipëri të zotëruar nga krimi brenda dhe jashtë parlamentit”, tha Basha.
Nga ana tjetër, në lidhje me institucionalizimin e tryezës së opozitës dhe mundësisë për të shtuar në të Frymën e Re Demokratike të Bamir Topit, Basha u shpreh i hapur dhe optimist, se “opozita do të shtohet edhe më shumë pasi ka mjaft të tjerë që e shohin veten në opozitë kundër kësaj qeverie”.
Ora 10: 50 Nis takimi me aleatët- Kryetari i PD-së Lulzim Basha ka nisur një takim me aleatët e tij në opozitë për të rakorduar qëndrimin e opozitës ndaj Kuvendit, pas ngjarjeve të javës së shkuar në parlament.
Në takim Basha shoqërohet nga Oerd Bylykbashi, Ivi kaso, Arben Ristani dhe Edmond Spaho.
Deri më tani PD nuk ka përjashtuar edhe mundësinë e dorëzimit në grup të mandateve të deputetit, pas prononcimit të enjten të ish Kryeministri Berisha, se ai po sheh seriozisht pozicionin e tij në raport me kuvendin.
Gjithashtu mësohet se në fokus të bisëdës është dhe reforma në drejtësi.
