Ashrtu siç kishte paralajmëruar një ditë më parë, ish-deputeti socialist Koço Kokëdhima, reagoi ndaj akuzave të ambsadorit amerikan që e quajti politikan të korruptuar. Gjatë një konference për mediat, Kokëdhima u shpreh se deklarata e ambasadorit është tepër fyese, pa prova dhe fakte sipas tij. SIpas Kokëdhimës qëndrimi i ambasadorit u ndikua nga ata njerëz që i hoqën mandatin në Gjykatën Kushtetuese.
“Të flasim hapur dhe sinqerisht. Deklaratë shumë e fortë që fyen personin tim. Kush është krimi që kam bërë unë? Gjykata Kushtetuese nuk më ka dënuar e cilësuar as si të korruptuar. Lu më përfshiu mua te politikanët e korruptuar dhe inkriminuar. Biznesi im është shoqëri e suksesshme që ka paguar taksat. Këtë e tregon fakti që në ‘98 themelova Abissnetin. Vendimi i Gjykatës Kushtetuese u ndikua politikisht”, deklaroi Kokëdhima.
Kokëdhima deklaroi se ka punuar me përkushtim në 3 vite që ka qenë deputet dhe se ka luftuar korrupsionin me emërimet.
“Më pak se 3 vitet e mia në politikë kam qenë deputet i Himarës dhe Sarandës, bëra sa munda për të luftuar korrupsionin. Nuk kam patur kurrë funksione shtetërore. Shqipëria ka lënguar në 25 vite nga qeveritë e korruptuara. Deklaratat e ambasadorit janë të ndikuara nga ata njerëz që goditën mandatin tim në Kushtetuese. Fatin e karrierës time në politikë nuk do të vendosin intrigat e politikanëve të Tiranës, vetëm qytetarët e vendit.
Kam respekt të madh për vlerat e Amerikës. Mirënjohje ndaj qeverive të Amerikës. Të gjithë shqiptarët nuk do ta harrojnë kurrë luftën për çlirimin e Kosovës dhe nuk do ta harrojnë kontributin e BE-së, NATO-s dhe SHBA-ve. Diçka e papëlqyeshme për mua për të bërë këto sqarime këtu. Kam qenë i prirur të bashkëpunoj me sinqeritet me ambasadorin e SHBA-ve dhe ambasadorët e tjerë për forcimin e marrëdhënieve mes vendeve”, tha Kokëdhima.
Ai ka theksuar se pavarësisht akuzave “do ta zhvillojë karrierën e tij në Partinë Socialiste”.
DEKLARATA E AMBASADORIT TE SHBA, DONALD LU
E para, siç e dini, me anë të reformës në drejtësi – për Shqipërinë po vijnë ndryshime të mëdha për sa i përket krijimit të prokurorisë së posaçme dhe Byrosë Kombëtare të Hetimit, BKH, të cilat do të jenë në gjendje të luftojnë korrupsionin e nivelit të lartë si kurrë më parë. Së dyti, për dekriminalizimin, i kemi dhënë lamtumirën një numri politikanësh kriminelë dhe të korruptuar – mes tyre, më vijnë në mend Xhelili, Frroku, Muhameti, Petraj, Ndoka dhe Kokëdhima. Kemi edhe nja dy që po përballen me akuza penale – Prenga dhe Rroshi – por teksa flasim janë në gjyq. Mendoj që ky është përparim i jashtëzakonshëm, jo vetëm në legjislacion por edhe i kulturës. Populli shqiptar është i lodhur nga këta zyrtarë të korruptuar dhe do që të shohë ndryshim.
/a.m.
