Nën kryetari i LSI-së Luan Rama në një dalje për media ka thënë se Lëvizja Socialiste për Integrim do të përfaqësojë të gjithë qytetarët e zhgënjyer.

Rama thekson se 75 % e shqiptarëve votuan kundër Rilindjes në zgjedhjet e 25 qershorit edhe pse PS fitoi zgjedhjet.

“Në mbledhjen e kryesisë bëmë një vlerësim të situatës  politike në vend duke e vënë theksin për krijimin e një fronti opozitar.

Ne jemi përballë një pushteti i cili që me nisjen e procesit zgjedhor por edhe më parë, edhe gjatë zgjedhjeve, dëshmoi papërgjegjshmëri por edhe atë që LSI e ka dëshmuar me kohë se kishim një proces të kriminalizuar; ku paratë e pista të krimit dhe të drogës dominuan mbi domosdoshmërinë për një dialog me qytetarët.

LSI si një forcë që në themel ka solidariutetin dhe humanizmin do të jetë më qytetarët për mbrojtien e interest publik për të qenë zëdhënës për 75% të qytetarëve këtij vendi që kanë votuar kundër Rilindjes,” tha Luan Rama.

Sakaq, ai foli edhe për grupet e posaçme të punës së ngritura brenda Kryesisë së LSI, dhe për kampingun veror të të rinjve të LRI në Jalë.

“Kryetar i grupit Parlamentar të LSI do të jetë Petrit Vasili. Do të vijohet duke përcaktuar edhe raportimin e funksionimit dhe bashkëveprimit mes strukturave të partisë dhe grupit të ri parlamentar që do të ketë LSI në Kuvend. Do të vazhdojmë me të njëjtin angazhim për përmbushjen e të gjitha veprimtarive të përcaktuara në planin e veprimit politik dhe organizativ të partisë që me fillimin e vitit.

Do të vijojmë edhe këtë vit me kampingun e Jalës, një veprimtari e kthyer në një institucion të formimit politik, dhe të krijimit të shkollës dhe debatit mes të rinjve, çka është edhe një prej vlerave më thelbësore të LSI.

Janë krijuar edhe grupe të posaçme pune në përbërje të kryesisë, ku do të ketë projekte që do të diskutohen në mbledhjen e ardhshme”, u shpreh Rama.