Lazio po kalon ndoshta periudhën më negative në vitet e fundit. Bardhekaltërit nuk po arrijnë të gjejnë ritmin e duhur në kampionat, ndërsa eliminimi nga Europa League i ka dhënë një tjetër goditje shpresave të tyre.
Për këtë arsye, presidenti i kryeqytetasve, Claudio Lotito ndryshe nga herë e tjera, kur kërkon ndihmën e drejtorit sportiv, Igli Tare, ka zgjedhur të kërkojë ndihmën e “hyjnive” për të rikthyer skuadrën në shinat e duhura përpara ndeshjeve të rëndësishme.
Dhe sipas asaj që raportohet nga “Il Messaggero”, pas eliminimit nga Sevilla, Lotito ka ftuar një prift në Formello, në mënyrë që ky i fundit të pastrojë me ujë të bekuar fushën dhe dhomën e zhveshjes së skuadrës. Ky lloj ‘ekzorcizmi’ mendohet se është përdorur për të larguar episodet negative që kanë ndodhur te Lazio në këtë periudhë.
Kjo është hera e katërt që ndodh gjatë presidencës së Lotitos. Më parë ai e ka praktikuar këtë gjë në vitet 2009, 2010 dhe 2013.
