Agjencia Kombëtare e Bregdetit ka njoftuar se ishulli i Sazanit këtë verë do të hapet për turistët. Këtë lajm e rikonfirmon edhe kryeministri Edi Rama në “Facebook”, ku shkruan se ky projekt ka ngjallur kuriozitet në faqet ndërkombëtare për turizmin.
Është “Lonely Planet” që flet për hapjen e ishullit të Sazanit për turistët. Siç theksohet në artikull ishulli i Sazanit ka rreth 3600 bunkerë dhe tunele, që do të përdoreshin për të përballuar sulmet e mundshme bërthamore.
“Ishulli i Sazanit është i vendosur në ngushticën e Otrantos në jug të Shqipërisë, ku bashkohen detet Jon dhe Adriatik. Ky ishull është teknikisht ende një bazë ushtarake, me një strehë nate për patrullat detare. Ishulli ka rreth 3600 bunkerë dhe tunele të shumta, të ndërtuara prej frikës së sulmeve bërthamore gjatë kohës së diktaturës komuniste të vendit,” shkruhet në artiukullin e “Lonely Planet”.
Në artikull gjithashtu vlerësohet biodiversiteti si dhe kushtet e zhvillimit të turizmit që ky ishull mund të ofrojë.
Ishulli i Sazanit ka gjithashtu biodiversitet të rëndësishëm dhe zyrtarë të turizmit në Shqipëri janë duke shpresuar se mund të bëhet një destinacion për zogjtë dhe për zhytjen. Ka edhe ide për të përdorur tunelet anti-bërthamore si qilare për verën. Ndërtesat e braktisura e ishullit janë përdorur si shtëpi për mbi 3000 trupa dhe aty ka edhe një shkollë të shkatërruar, e cila u ndoq nga fëmijët e familjeve të ushtarakëve. Sazani mund të arrihet për rreth gjysëm ore me motoskaf nga Vlora dhe është planifikuar që në qershor të fillojë udhëtimet një anije e përditshme, shkruan “Lonely Planet”.
