Presidenti i SHBA-së, Donald Trump, mund të vazhdojë të mbajë në fuqi tarifat e importit. Kështu është shprehur në një vendim, një gjykatë apeli në SHBA, një ditë pas vendimit gjykatës federale e cila e shpalli pjesën më të madhe të tarifave të tij globale si të paligjshme.
Një gjykatë federale e apelit miratoi një kërkesë nga Shtëpia e Bardhë për të pezulluar përkohësisht urdhrin e gjykatës së shkallës së parë, e cila vendosi që Trump kishte tejkaluar pushtetin e tij duke imponuar detyrimet.
Vendimi i së mërkurës nga Gjykata Amerikane e Tregtisë Ndërkombëtare shkaktoi zemërimin e zyrtarëve të Trump, të cilët e quajtën atë një shembull të tejkalimit të kompetencave gjyqësore.
Bizneset e vogla dhe një grup shtetesh kishin sfiduar masat, të cilat janë në zemër të axhendës së Trump dhe kanë tronditur rendin ekonomik botëror.
Në apelin e saj, administrata Trump tha se vendimi i marrë nga gjykata tregtare e kishte vënë në dyshim në mënyrë të papërshtatshme presidentin dhe kërcënonte të prishte muaj të tërë negociatash tregtare të ashpra. “Degët politike, jo gjykatat, bëjnë politikën e jashtme dhe hartojnë politikën ekonomike”, thuhej në dosje.
Pak para pezullimit të tarifave të së enjtes nga gjykata e apelit, zëdhënësja e Shtëpisë së Bardhë, Karoline Leavitt, tha në një konferencë për shtyp: “Amerika nuk mund të funksionojë nëse Presidenti Trump, ose ndonjë president tjetër, i ka negociatat e tyre të ndjeshme diplomatike ose tregtare të penguara nga gjyqtarë aktivistë.”
Trump e kritikoi vendimin e gjykatës së shkallës së parë në një postim në rrjetet sociale, duke shkruar: “Shpresojmë që Gjykata Supreme do ta përmbysë këtë vendim të tmerrshëm dhe kërcënues për vendin, SHPEJT dhe VENDIMSHËM”.
Vendimi i së mërkurës nga gjykata pak e njohur tregtare në Nju Jork do të anulonte tarifat e vendosura nga Trump në shkurt për mallrat nga Kina, Meksika dhe Kanadaja, të cilat ai i justifikoi si një veprim që synonte të adresonte kontrabandën e fentanilit.
Vendimi i gjykatës së shkallës së parë do të rrëzonte gjithashtu një taksë të përgjithshme prej 10% mbi importet që Trump zbuloi muajin e kaluar për mallrat nga vendet e botës, së bashku me të ashtuquajturat tarifa reciproke më të larta për partnerët tregtarë, përfshirë BE-në dhe Kinën.
