Letërsia nuk është vetëm një burim kënaqësie, por edhe themeli i një shoqërie moderne, të lirë dhe demokratike, kështu që nuk duhet të lejoni t’ju manipulojnë dhe mos e lejoni që fokusi i pushtetit të ikë prej njerëzve, tha në Novi Sad, fituesi i Çmimit “Nobel”, Mario Vargas Llosa.
“Ushqeni një mendje kritike për të ndërtuar një të ardhme më të mirë, dhe e gjithë kjo mund të arrihet vetëm me anë të letërsisë,” tha Llosa gjatë një mbrëmje letrare zhvilluar në Novi Sad, organizuar nga shtëpia botuese Laguna.
Llosa ka thënë se Evropa ka luajtur një rol shumë të rëndësishëm për letërsinë Hispano-amerikane, sidomos këtë e ka ndjerë gjatë periudhës së qëndrimit të tij në Barcelonë në vitin 1963, ku ai shkroi romanin “Qyteti dhe qentë”.
“Rëndësinë e lëvizjes hispaniko-amerikane në letërsi, e kam gjetur vetëm kur kemi ardhur në Evropë, për shkak se në atë kohë shkrimtarët në Amerikën Latine qëndronin vetëm në vendet e tyre, sidomos në Peru, dhe librat atëherë nuk qarkullonin shumë atje. Evropa është e rëndësishme për shkak se në të ka ndodhur bumi i shitjeve në letërsi “, ka thënë Llosa.
