Kuvendi i Shqipërisë miratoi sot projektligjin “Për regjistrin qendror të llogarive bankare”. Relatori Ervin Bushati i cili mbrojti projektligjin në Kuvend u shpreh se krijimi i një regjistri qendror të llogarive bankare është një domosdoshmëri për rritje të transparencës dhe sigurisë kombëtare.
“Sot miratojmë një ligj kyç për sa i përket, jo vetëm zhvillimit dhe formalizimit të ekonomisë por një momenti kur ne parandalojmë terrorizmin, rrisim sigurinë kombëtare dhe patjetër jemi në linjë me atë që ka qenë misioni ynë në marrjen e këtij mandati që është formalizimi i ekonomisë,” u shpreh Bushati.
Ligji i ri sipas deputetit socialist shënon një hap para në parandalimin e përdorimit të sistemit tonë financiar për pastrim parash dhe produktesh që burojnë nga vepra penale, parandalimin e financimit të terrorizmit dhe lehtësimin e procedurave të mbledhjes së detyrimeve tatimore në vend.
Projektligji “Regjistri Qendror i Llogarive Bankare”, vjen në vijim të strategjisë kombëtare dhe në përputhje me modelet e partnerëve strategjikë, në luftën kundër krimit dhe pastrimit të parave. Ai u miratua me 93 vota pro, 11 kundër dhe 6 abstenim.
/a.r
