Llalla rrëzon 11 deputetët që paditën Berishën në Prokurori për armatosjen e popullsisë!

Prokuroria e Përgjithshme ka vendosur të mos nisë hetime ndaj ish-kryeministrit Berisha, lidhur me thirrjet e tij për armatosje të popullsisë. Në një deklarim për mediat, institucioni më i lartë i akuzës në vend bëri të ditur se pas verifikimit të 11 pretendimeve të deputetëve të Parlamentit lidhur me këto thirrje, ka vendosur të mos nisë hetime ndaj Berishës, me arsyetimin se deklaratat e ish-kryeministrit janë bërë në kuadër të veprimtarisë parlamentare.

“Prokuroria nuk do të fillojë procedim penal ndaj deputeti Sali Berisha. Prokuroria verifikoi pretendimet e 11 deputetëve. Deklaratat e tij janë bërë në funksion të veprimtarisë parlamentare. Deklaratat janë në përmbushje të fjalës së lirë të opozitës. Deklaratat e Berishës nuk kanë elementë të veprës penale. Thirrjet për armatosje të popullsisë janë çështje këndvështrimesh”, bëri të ditur Prokuroria e Përgjithshme.

11 deputetë të Kuvendit kishin paditur kohë më parë Berishën në Prokurorinë e Përgjithshme për deklaratat e tij ku kërkonte armatosjen e popullatës me qellim rrezimin me armë të qeverisë.  Këto thirrje tronditën opinionin publik dhe atë ndërkombëtar, por duket jo Prokurorinë e Përgjithshme.

Vendimi i Prokurorisë:

“Prokuroria e Përgjithshme ka vendosur mosfillimin e procedimit penal ndaj deputetit Sali Berisha, mbi bazën e kallëzimit të një grupi deputetësh, për veprat penale të parashikuara nga nenet 222, 223 dhe 267 të Kodit Penal.

Më datë 29.04.2016, disa deputetë të Kuvendit të Shqipërisë kanë depozituar në Prokurorinë e Përgjithshme, kallëzim penal ndaj deputetit Sali Berisha, për kryerjen e elementëve të veprave penale të mëposhtme : ­“Thirrjet për armatosje ose marrja pa të drejtë e komandës”, parashikuar nga neni 222 i Kodit Penal; ­“Thirrjet publike për veprime të dhunshme”, parashikuar nga neni 223 i Kodit Penal;, dhe “Përhapja e informatave të rreme që ngjallin panik”, parashikuar nga neni 267 i Kodit Penal.Nga përmbajtja e kallëzimit penal, të paraqitur nga grupi prej 11 deputetësh të Kuvendit të Shqipërisë, rezulton ndër të tjera të jetë pretenduar se, në seancën plenare të Kuvendit të Shqipërisë të datës 21.04.2016, deputeti Sali Berisha, ka konsumuar tre veprat penale te sipërcituara, kur ka deklaruar se: “… Unë kam një kërkesë për shqiptarët sot: ju bëj thirrje qytetarëve shqiptarë, për sigurinë e tyre, të armatosen, të sigurojnë armë…”. “… Ju bëj thirrje, Ju bëj thirrje (…) Po, po të armatosen, se armatosen amerikanët. Të armatosen të gjithë qytetarët që duan të mbrojnë veten e tyre.”.

“Nëse ju o organizatë kriminale, mendoni të terrorizoni opozitën dhe qytetarët me bandat tuaja, ju garantoj se opozita dhe qytetarët janë të gatshëm t’jua kthejnë ju me të njëjtat mjete…”. “Dhe tani, sapo përmenda fjalën “armë”, ju ngritë nga frika, ju ka hyrë frika deri në palcë”.

Prokuroria e Përgjithshme kreu verifikimet mbi pretendimet e kallëzuesve dhe vendosi mosfillimin e procedimit penal ndaj deputetit të kallëzuar, duke argumentuar në mënyrë të përmbledhur, si më poshtë:

– Deklaratat e deputet të Kuvendit të Shqipërisë, nga foltorja e sallës plenare, janë bërë në funksion të veprimtarisë parlamentare dhe në përmbushje të fjalës së lirë të opozitës parlamentare; ­Deklarimet e bëra prej të kallëzuarit, në cilësinë e deputetit, ndonëse të kryera në ambjentet e Kuvendit, gjatë një veprimtarie parlamentare dhe të lidhura me çështjet në debat parlamentar, nuk përmbushin elementët e ndonjë vepre penale. ­

Prokuroria arrin në përfundimin se, fjalimi i të kallëzuarit, deputetit Sali Berisha në seancën plenare të datës 21.04.2016, është bërë në funksion të veprimtarisë dhe lirisë parlamentare. Fjala e mbajtur prej tij konsiderohet se janë pjesë e lirisë parlamentare të fjalës, mendimit dhe qëndrimeve, në ushtrim të mandatit të deputetit të garantuar dhe parashikuar nga neni 73 i Kushtetutës. ­

Shprehjet e përdorura prej tij dhe të konsideruara nga kallëzuesit si të tilla që përmbajnë elementët e veprave penale të referuara, nuk mund të vlerësohen të shkëputura nga konteksi i fjalimit të mbajtur prej të kallëzuarit, deputetit Sali Berisha. ­Prokuroria çmon se nuk mund të konsiderohet si vepër penale shfaqja e mendimit e bërë për armatosjen e popullsisë për të mbrojtur veten, familjen, pronën etj, në kushtet kur në vlerësimin e deputetit të kallëzuar, shteti i ka lënë të lirë kriminelët dhe në funksion të saj, sugjeron përgatitjen e një ligji të tillë që justifikon pajisjen e tyre me armë, duke marrë si shembull SH.B.A­të, të cilat e kanë të lejuar mbajtjen e armëve të zjarrit.

– Pikëpamja, sipas të cilës shteti mund të lejojë pajisjen me armë e popullsisë në mënyrë ligjore, është një këndvështrim politik, i cili nuk është i ri, pasi ka eksperienca të tilla në vende të ndryshme të botës, përfshi këtu edhe SH.B.A­në, por kjo nuk do të thotë që ata politikanë të cilët e përqafojnë këtë kauzë duhet të mbajnë përgjegjësi ligjore. Në bazë të këtyre argumentave, të paraqitura në mënyrë të përmbledhur, Prokuroria e Përgjithshme vendosi mosfillimin e procedimit penal ndaj deputetit Sali Berisha.

(javanews.al) Me. Ar