Prokurori i Përgjithshëm Adriatik Llalla ka reaguar pas lajmeve të publikuara në mediat ndërkombëtare, që pretendojnë se fitimet e kanabisit të prodhuar në Shqipëri, veçanërisht në Lazarat janë përdorur për financimin e terroristëve të ISIS.
Llalla deklaroi pas zhvillimit të Analizës së Prokurorisë Gjirokastër se është e vërtetë që është kultivuar kanabis, por nuk kemi të bëjmë në mënyrë kategorike me vepra të tjera që lidhen me terrorizmin.
Sipas Llallës këto lajme të pavërteta kanë dëmtuar rëndë imazhin e shtetit.
“Është e vërtetë që në Lazarat është kultivuar kanabis, por kanabisi nuk ka lidhje me terrorizmin. Banorët nuk kanë kryer vepra penale që lidhen me terrorizmin.
Këto janë lajme mediatike që kanë dëmtuar rëndë imazhin e shtetit shqiptar para partnerëve ndërkombëtarë. Kemi marrë masa që kultivimi i kanabisit të marrë fund”, deklaroi kryeprokurori Llalla.
