Prokurori i Përgjithshëm, Adriatik Llala, i thirrur sot në Komisionin e Sigurisë Kombëtare për të dhënë shpjegime mbi të ashtëquajturën “afera e pajisjes së përgjimeve”, ka deklaruar se ka nisur një procedim penal mbi bazën e një informacioni gojor të kreut të SHISH, Visho Ajazi. Sipas tij çështja është në hetim dhe shumë shpejt pritet të ketë edhe konkluzione. Përkundër pretendimeve të Presidentit Nishani, Lllalla nuk ka deklaruar se ka pasur pengesa nga Qeveria për hetimin e kësaj çështje. “Hetimi ka vetëm 5 ditë që ka filluar. Çështja është ende në fazën e hetimit. Prokuroria ka krijuar një grup të posacëm pune për të mbaruar sa më shpejt këtë hetim”, ka deklaruar Llalla.
Kreu i akuzës ka justifikuar informacionin gojor të kreut të shërbimit sekret për të nisur hetimet, pasi sipas tij, është detyrim i prokuroris se kur ka dyshime nis hetimet, “aq më shumë kur vlerësohet se mund të ketë cënim të sigurisë kombëtare”. Por Llalla nuk ka arritur të japë dot një përgjigje përpara deputetëve, ndonëse kanë kaluar 5 vjet nga nisja e hetimit, lidhur me denoncimin zyrtarë në adresë të Ministrisë së Mbrojtjes të drejtuar në atë kohë nga ish- ministri i PD-së, Arben Imami, për përgjime të paligjshme nga ana e institucionit që ai mbulonte. Llalla u mjaftua vetëm me frazën “hetimet vazhdojnë”, ndonëse kanë kaluar 5 vite e nuk ka asnjë rezultat.
(javanews.al) Me. Ar
