LIVE/ Opozita kosovare nis protestën, në shesh vetëm flamuj kombëtarë

Ka filluar protesta e paralajmëruar e opozitës kosovare në Prishtinë.

Mbështetësit e opozitës nisën grumbullimin para Bibliotekës Kombëtare, prej ku nisën marshimin drejt sheshit “Skënderbeu”.

Opozita zhvillon protestonë kundër Asociacionit të komunave serbe dhe Demarkacionit me Malin e Zi.

Bëhet e ditur se numër i madh i autobusëve janë nisur nga qytete të ndryshme për në Prishtinë. Po ashtu protestës i janë bashkuar edhe disa qindra aktivistë nga Shqipëria.

Më poshtë mund të ndiqni LIVE protestën e opozitës kosovare në Prishtinë:

https://www.youtube.com/watch?v=zQgUjb6V3oE

Protestohet vetëm me flamujt kombëtar shqiptar

Flamuj të shumtë kuq e zi janë parë në duart e protestuesve, të cilët janë mbledhur para Bibliotekës Kombëtare. Midis tubuesve nuk shikohet asnjë flamur i shtetit të Kosovës.

Ndërkohë Policia e Kosovës në shumicën e rrugëve është stacionuar me autoblinda.

Albin Kurti i bashkëngjitet protestuesve

Ish-lideri i lëvizjes Vetëvendosje, Albin Kurti i është bashkangjitur grupit të protestuesve të cilën tashmë kanë filluar të mblidhen para Bibliotekës kombëtare.

Ish-lideri i lëvizjes Vetëvendosje, Albin Kurti tha se kjo do të jetë pranverë e rilindjes së demokracisë.

Ai tha se kërkojnë që pavarësia të jetë e mbushur me sovranitet e zhvillim ekonomik, të eliminohet korrupsioni, duke filluar prej qeverisë.

Kurti tha se Zajednica ka vdekur, ka marrë fund, e do të merr fund edhe kjo qeveri. Lidhur me mbajtjen e flamujve kombëtar dhe jo atij shtetëror, Kurti tha se populli e di më së miri cilin flamur ta mbajë.

Ai tha se protesta do të jetë paqësore.

Arrestohen 5 persona, mbanin benzinë e mjete të forta

Policia e Kosovës ka arrestuar pesë persona dhe tek ta ka gjetur bidon me benzinë dhe sende të forta.

Të dyshuarit të cilët kanë qenë duke udhëtuar me një veturë të tipit BMW me targa RKS 03, së pari janë ndalur para Gjykatës Kushtetuese, dhe pas kontrolleve tek ta është gjetur sasi e lëndës djegëse dhe sende të forta.
Këtë për KosovaPress e ka konfirmuar edhe zyrtari për informim në Policinë e Kosovës Daut Hoxha, por nuk ka dhënë detaje më shumë.
Nuk dihet nëse të dyshuarit bashkë me lëndën djegëse ishin nisur për protestën e opozitës.