Nën moton “Së bashku për Shqipërinë” ka nisur në Bruksel Konferenca e Donatorëve që synon mbledhjen e ndihmave për tërmetin e 26 Nëntorit 2019.
Komisioni Europian përpos 15 mln eurove i ka dhënë Shqipërisë edhe 100 mln euro të tjera për rindërtimin pas tërmetit tragjik të 26 nëntorit.
Presidentja e KE-së, Von der Leyen u shpreh se mbështetja për Shqipërinë do të vijojë për rindërtimin për ta filluar nga e para pasi dëmet janë shumë të mëdha.
“Ju falenderoj që keni ardhur kaq shumë. 51 persona humbën jetën nga tërmeti, të gjithë i kemi dëgjuar historitë e tyre me dhimbje, një cift i ri që ishin gati për t’u martuar, një nënë që vdiq në përpjekje për të mbrojtur vajzën e saj.
Kur ne shkuam i gjithë vendi ishte në zi, por u mobilizua për të ndihmuar ata që humbën gjithcka. Kjo është një histori humbje, por edhe një histori heronjsh, një histori solidaritet mes vetë shqiptarëve dhe europianëve. Brenda disa orëve ekipet e para të shpëtimit nga vendet europiane shkuan duke filluar gërmimet në rrënoja për të shpëtuar jetë. E gjithë BE-ja u mobilizua, populli i Shqipërisë e di se ata e kanë vendin në familjen Europiane.
Sot me këtë pjesëmarrje mbresëlënëse ju tregoni reagimin e fortë pas thirrjes së Shqipërisë, nga Mali i Zi deri në Kanada, nga Turqia deri në Izrael, nga Zvicra deri në SHBA. Ne kemi parë ekipet serbe dhe kosovare që punon krah për krah për të shpëtuar fqinjët. Solidariteti ka shpëtuar shumë jetë në Shqipëri. Ekipet e shpëtimit nxorën 49 persona nga rrënojat.
Nevojat e Shqiprëisë janë shumë të mëdha, mijëra shtëpi duhen rindërtuar, shkolla, spitale. Kostoja e rindërtimit është vlerësuar 1 mld euro, vetëm Shqipëria nuk mund ta përballojë këtë barrë. Ne i premtojmë popullit shqiptar që jemi aty, që solidariteti jonë do të fillojë të jetë po aq i fortë sa ishte në orët e para. Ne angazhohemi për rindërtimin në vazhdimësi. Askush nuk mund ta plotësojë boshllëkun e atyre që kanë humbur, por ne mund ta ndihmojmë Shqipërinë që ta fillojë nga e para. Transparencë dhe llogaridhënie të plotë në terren. KE jep 100 mln euro nga buxheti i BE-së përtej 15 mln eurove” tha ajo.
Konferenca e donatorëve, zbulohet shuma që do të japë Britania e Madhe
