Kryeministri i vendit Edi Rama zgjodhi sot Qarkun e Lezhës për të konsultuar publikisht buxhetin 2018-të. Ndërsa premtoi se do të çojë deri në fund reformën kundër informalitetit, Rama u ndal edhe tek projektet reale për këtë qark. Ai sqaroi për herë të parë edhe arsyet pse biznesi i vogël do bëhet pjesë e TVSH-së, duke shtuar se për ta taksat mbeten zero.
“Ne duam që TVSH të mos përfundojë në xhepat e një grushti të pasurish. Përpiqemi të bëjmë politika të drejta. Biznesi i vogël e ka taksën zero, do ta ketë zero deri në një kufi të caktuar. Mosdhënia dhe mos marrja e faturës së TVSH është arsyeja pse i bëmë pjesë të skemës. Rezulton se ka disa biznese që deklarohen si të vegjël e qahen si të vegjël por që nuk janë të tillë. Limitin 15% e kanë kompanitë e mëdha, aq do ta kenë”,- sqaroi Rama.
Kryebashkiaku i PD: Gati të bashkëpunojë me Ramën, ndonse do doja që në vendin tënd të ishte Basha
Kryebashkiaku i Lezhës, Fran Frrokaj, pavarësisht prezencës së kryeministrit Edi Rama, nuk është kursyer për t’ja thënë sy më sy këtij të fundit se do të donte që në vend të tij të ishte Lulzim Basha.
Teksa priti kreun e qeverisë, pasi Lezha ishte ndalesa e radhës për konsultimin publik për buxhetin 2018, Frrokaj pohoi se do t’i mbështeste projektet e qeverisë, pavarësisht bindjes së tij politike, pasi vjen nga radhët e PD-së.
“Unë do të mbështes në projektet që ke, nuk do e bëj si ajo shprehja; për inat të vjehrrës, shkova me mullixhiun. Do doja që në vendin tuaj të ishte Basha, por shqiptarët e bënë zgjedhjen e tyre”, tha Fran Frrokaj.
ma.me
