Numërimi mbrapsht për Botërorin e parë të futbollit dimëror në histori pothuajse ka përfunduar: sot në orën 17:00 gjithçka nis me Katar-Ekuadori, por rreth orës 15:40 stadiumi “Al Bayt” është protagonist i ceremonisë së inaugurimit që premton të jetë spektakolare në një objekt shumë teknologjik i futur në zemër të shkretëtirës në Al Khor.
60.000 spektatorët do të ndjekin shfaqjen, që zgjat një gjysmë ore të bollshme, të firmosur nga italiani Marco Balich.
E si gjithmonë në një eveniment të tillë nuk ka se si të mungojë protagonizmi i Radio Televizionit Shqiptar, ekrani i të gjithë shqiptarëve, që do të transmetojë këtë eveniment nga fillimi në fund. Emisione, të ftuar special, analiza, kuriozitete, gjithçka për ta bërë sa më të pranishëm në shtëpinë e të gjithë shqiptarëve këtë aktivitet të shumëpritur.
Është Botërori më i shtrenjtë në histori, që nga momenti kur FIFA vendosi të shpenzojë 440 milionë dollarë për shpërblimet e futbollistëve gjatë gjithë turneut të futbollit. Kjo do të thotë se një lojtar pjesëmarrës në Katar do të përfitojë maksimumi 370 mijë dollarë, ndërsa skuadra që do të marrë trofeun, do të arkëtojë edhe 42 milionë dollarë si shpërblim, 4 më shumë se përfitoi Franca në Rusi. Nënkampionët e botës në Katar përfitojnë 30 milionë dollarë e pastaj në zbritje progressive për të gjitha vendet e arritura.
32 skuadra do të zbresin në fushat e impianteve moderne, të një teknologjie inovative, ku gjithcka është menduar në detaje, për tu përshtatur me traditën e kulturën katariote. Është po, botërori më luksoz, në vendin e vogël që pak lidhje kishte me futbollin deri në momentin kur trazoi planetin me mënyrën si u zgjodh e pasojat që shkaktoi vota për ta e deri në akuzat që u derdhën si lumë për të drejtat e njeriut apo për faktin se më shumë se 6,500 punëtorë humbën jetën në 11 vjet – një mesatare prej 12 në javë – gjatë ndërtimit të stadiumeve të Kupës së Botës 2022 në Katar.
Mesi i sezonit me lojtarët në kulmin e formës, distancat e vogla për tu përshkuar nga një ndeshje në tjetrën, mjaftojnë për ti dhënë të drejtë se Katar 2022 do të jetë një magji… një magji nën emrat e mëdhenj të futbollit, i fundit për lojtarët më të titullar Ronaldo e Messi…
/a.r
