Të besuarit e Lulzim Bashës në 12 qarqe të vendit kanë përfunduar mbrëmjen e djeshme raportet për listat e deputetëve të propozuar nga strukturat e PD-së në rrethe për zgjedhjet e 25 qershorit. Në orën 00:00 të së martës ka skaduar edhe afati që kreu i PD-së, Basha, u kishte lënë 12 drejtuesve të grupeve të punës në lidhje me marrjen e propozimeve nga çdo qark i vendit, në mënyrë që në dy ditët e mbetura të përcaktohen edhe listat përfundimtare të opozitës.

Burime pranë grupeve të punës sqarojnë se Basha ka kërkuar që me secilin prej 12 drejtuesve të zhvillojë takime të veçanta për të marrë propozimet dhe opinionet që baza e PD-së ka për kandidatët për deputetë. Të kontaktuar nga “Panorama”, drejtuesit e grupeve të punës kanë konfirmuar se Bashës do t’i paraqitet një numër i lartë kandidaturash nga çdo rreth dhe do të jetë ai dhe grupi i punës që do të përcaktojnë edhe listat përfundimtare.

Grupi

Në përcaktimin e drejtuesve të grupit të punës, të cilët kanë mbledhur propozimet e strukturave për deputetë, Basha u kujdes që secili deputet apo funksionar të mos kishte konflikte interesi me degën në të cilën u caktua.

Kështu, kreu i Grupit Parlamentar të PD-së, Edi Paloka, i ka dorëzuar Bashës listën e kandidatëve për deputetë në qarkun e Shkodrës; nënkryetari i PD-së Spaho propozimet e Korçës; sekretari i Përgjithshëm Ristani listën e Lezhës; deputeti Aldo Bumçi propozimet e degëve të Tiranës; deputetja Albana Vokshi listën e Elbasanit; deputeti Noka propozimet e Fierit, deputeti Florion Mima propozimet e Durrësit; deputeti Gent Strazimi propozimet e Gjirokastrës; deputetja Dhurata Çupi propozimet e degës së Kukësit; sekretari për Aksionin Qytetar, Ervin Salianji, listën e Dibrës; kreu i Departamentit të Shëndetë- sisë, Tritan Shehu, listën e Beratit dhe sekretaria për Marrëdhëniet me Publikun, Grida Duma, propozimet e Vlorës.

Burimet sqarojnë se në listat e propozuara nga strukturat ka përfaqësues të botës akademike, familjarë të ish-të përndjekurve politikë, krerë të degëve lokale, biznesmenë, anëtarë të forumeve rinore etj.

Listat

Duket se kreu i PD-së, Basha, do ta përdorë të gjithë kohën ligjore që ka vendosur KQZ-ja për partitë opozitare për dorëzimin e listave për deputetë. Burime pranë selisë blu bëjnë me dije se PD-ja do t’i dorëzojë listat e saj për deputetë ditën e premte në datën 26 maj, kur është edhe afati përfundimtar për dorë- zimin e listave.

Ndonëse askush në PD nuk është i sigurt nëse do të jetë pjesë e listave për deputetë, një pjesë e emrave mund të konsiderohen se pa u shpallur listat do të jenë në vende fituese. Surprizë pritet të jetë edhe vendimi që vetë Basha do të marrë për listën që ai do të udhëheq.

Burime pranë PD-së bëjnë me dije se vetë Basha dhe ish-kryeministri Berisha mund të mos jenë në qarkun e Tiranës duke udhëhequr lista të deputetëve në dy qarqe të tjera të mëdha. Sa u takon listave, dihet se pas marrëveshjes së arritur me aleatët opozitar, Basha ka garantuar se të paktën katër prej tyre do të jenë pjesë e listave fituese.

Burimet sqarojnë se bëhet fjalë për kreun e PR-së, Fatmir Mediu, kreun e PDK-së, Nard Ndoka, kreun e LZHK-së, Dashamir Shehi dhe kreun e PAA-së, Agron Duka. Ky i fundit ka shprehur dëshirën edhe për të dalë i vetëm në zgjedhje, ndaj edhe nuk është marrë një vendim përfundimtar.

Në listat fituese pritet të jenë edhe 12 drejtuesit e grupeve të punës për përzgjedhjen e kandidaturave për deputetë në qarqe. Edhe deputetët e opozitës që bëjnë pjesë në komisionet e vetingut duket se do të kenë besimin Bashës për të qenë në lista fituese.

DREJTUESIT E GRUPEVE TË PUNËS

SHKODER Edi Paloka

LEZHE Arben Ristani

KUKES Dhurata Çupi

DIBER Ervin Salianji

DURRES Florjon Mima

ELBASAN Albana Vokshi

FIER Flamur Noka

BERAT Tritan Shehu

KORÇE Edmond Spaho

VLORE Grida Duma

GJIROKASTER Gent Strazimiri