Nisma e presidentit të Kosovës, Hashim Thaçi për transformimin e rolit të Forcës së Sigurisë së Kosovës në ushtri, nga këndvështrimi i përfaqësuesve politikë të komunitetit serb në Kosovë, është një ide joserioze, e cila nuk i kontribuon paqes, vlerësojnë përfaqësuesit e Listës Serbe, e cila përfaqëson komunitetin serb në institucionet qendrore të Kosovës.
Slavko Simiç, drejtuesi Listës Serbe dhe shef i grupit parlamentar të këtij subjekti në Kuvendin e Kosovës, thotë për Radion Evropa e Lirë se në këtë rast Lista Serbe nuk do t’i mbështesë ndryshimet ligjore për transformimin e misionit ose zgjerimin e kompetencave të Forcës së Sigurisë së Kosovës, pa ndryshimet e nevojshme kushtetuese.
“Pasi që Kuvendi i Kosovës tashmë ia ka proceduar projektligjin Qeverisë, unë po shpresoj që Qeveria do të heqë dorë që t’ia procedojë sërish Kuvendit, sepse dje kemi pasur reagimet konkrete të Ambasadës amerikane dhe të NATO-s, si dhe të shumë zyrtarëve të huaj. Jam i sigurt që Qeveria do ta marrë përgjegjësinë dhe atë projektligj nuk do ta procedojë në Kuvend. Është e dukshme që dikush këtu po përpiqet të krijojë fuqi politike”, ka thënë Simiç.
Por, kryeministri i Kosovës, Isa Mustafa, në një komunikatë të dërguar për media nga Qeveria e Kosovës, ka theksuar se “avancimi i rolit të FSK-së në ushtri është në interes të të gjithë qytetarëve të Kosovës, pa marrë parasysh përkatësinë e tyre etnike”, citohet Koha. (b.an)
