Në Qarkun e Tiranës, Partia Demokratike ka fituar 13 mandate, por vetëm një prej tyre vjen përmes votës preferenciale të listës së hapur – dhe pikërisht ky mandat po kthehet në një betejë të fortë mes dy figurave të njohura të opozitës: Jorida Tabaku dhe Ilir Alimehmeti.
Sipas të dhënave më të fundit, Tabaku ka marrë 8.778 vota, duke u shkëputur me rreth 400 vota nga Alimehmeti, i cili numëron 8.380. Diferenca mbetet ende e ngushtë, por trendi i votave të deritanishme sugjeron një avantazh në rritje për deputeten Tabaku, e cila duket se po konsolidon mbështetjen e saj në Tiranë.
Kjo garë ka marrë vëmendje të veçantë pasi të dy kandidatët ishin lënë jashtë 12 emrave të sigurt nga Berisha në listën e mbyllur, duke u detyruar të sfidojnë veten përmes votës së drejtpërdrejtë të qytetarëve. Tabaku, një nga figurat teknike më të vlerësuara në PD, dhe Alimehmeti, një profesionist me profil qytetar e akademik, janë kthyer në simbol të dy poleve brenda së njëjtës parti.
Ndërkohë që numërimi vazhdon, çdo votë mund të jetë vendimtare për fatin e përfaqësimit të tyre. Pamfleti do të vijojë të raportojë në kohë reale mbi këtë garë të ngushtë që, përtej një mandati, përfaqëson edhe drejtimin që demokratët i japin të ardhmes së partisë së tyre.
