E ftuar në Alsat-M ishte juristja e aktivistja Liridona Beqiri, e cila foli rreth zgjedhjeve lokale në Maqedoni ku komentoi mbi të drejtat dhe përfaqësimin e femrës në politikë.
Ajo u shpreh se shoqëritë demokratike kanë shtetin ligjor dhe të drejtat e njëriut si bazë me të cilin e ngrenë shtetin e tyre.
“Kur flas për të drejtat e njeriut, këtu dua të theksoj të drejtat e grave në këtë aspekt. Mund të them që demokracia shqiptare ende ndodhet në një tranzicion problematik dhe jo të kontrolluar. Kur them kështu, konsistoj në përfshirjen e grave në proceset politike, në jetën publike dhe aq më shumë në aktivizmin publik,”– u shpreh Beqiri.
Më tej ajo tha se do të dëshironte më tepër kandidate femra në politikë.
“Në një sistem unik administrativ sic synojmë ne të jemi, patjetër që përfshirja e grave si përfaqësuese e 50% të sovranit, do ishte e dëshirueshme të ishte më prezente pjesëmarrja e grave sepse është një e drejtë dhe një domosdoshmëri.
Një e drejtë sepse ia garanton ligji e kushtetuta dhe një domosdoshmëri sepse përfaqëson një indikator që është një natyrë integruese dhe unifikuese në proceset politike dhe vendimmarrëse. Gruaja shqiptare ka vërtetuar që ka potencë politike vendimarrje edhe në de juro dhe jo vetëm de fakto,”- përfundoi Beqiri.
/b.h
