Lippi luan kartat e tij për Serinë A: Juvja me Romën në pol
Viareggio-Bocca di Serchio, 25 kilometra me biçikletë. Marcello Lippi po stërvitet. “Nuk jam shumë i bindur për tërheqjen nga futbolli. Ka mbaruar vera, mbas disa muajsh në orën pesë të pasdites do të errësohet…” thotë ish-trajneri i Juves dhe i Italisë në një intervistë për “Gazzetta dello Sport”. Domethënë, jeta e pensionistit e ka mërzitur Lippin që tani.
Juventusi e ka nisur kampionatin me një rekord negativ
“Kush mendon se Juvja është e ngopur apo në krizë e ka shumë gabim. Do të luftojë deri në fund për të fituar titullin e pestë radhazi. Disa largime kanë qenë të rënda. Por Tevez donte të kthehej te Boca dhe Pirlo, si njeri i zgjuar, e ka kuptuar se këtë vit tek Juventus do të kishte luajtur më pak. Për këtë arsye ka zgjedhur të jetojë një eksperiencë të jashtëzakonshme në Neë York. Do të shikoni se Pirlo do të jetë thelbësor pë Italinë në Europian”.
Juventusi ka bërë shumë ndryshime.
“Po, por senatorët janë akoma aty. Buffon, Bonucci, Chiellini, Barzagli, Marchisio do të ndihmojnë të rinjtë. Pa Khedira, Marchisio, Morata nuk është Juventusi i vërtetë. Skuadra është e fortë. Hernanes mund të funksionojë, Dybala është një talent i madh dhe për Alex Sandro kam dëgjuar shumë fjalë të mira”.
Domethënë Juventusi është favorit për titullin?
“Me Romën pothuajse në të njëjtin nivel. Klubi verdhekuq ka bërë dy-tre blerje të rëndësishme. Dzeko ishte sulmuesi i parë që i duhej. Dhe kam mbetur i befasuar nga lehtësua me të cilën Digne është integruar me skuadrën. Çfarë personaliteti!”.
Çfarë roli mund të ketë Totti?
“Kjo është një temë delikate. Totti mund të ndryshojë akoma një ndeshje me një nga goditjet e tija. Por ai dhe Garcia duhet të kenë një marrëdhënie të qartë. Totti nuk mund të luajë gjithmonë, dhe si njeri i zgjuar që është e di mirë këtë, por, nga ana tjetër, nuk mund të mos luaj për 4-5 ndeshje radhazi. Roma duhet t’i garantojë hapësira, që nuk do të mungojë mes kampionatit dhe Championsit. Juvja dhe Roma nuk kanë pasur fat me shortin, por do të avancojnë. Pres një paraqitje të madhe nga bardhezinjtë kundër Manchester City”.
Po milanezet?
“Pas shpenzimeve që kanë bërë janë në radhë të dytë, mbas Juventusit dhe Romës. Derbi ndoshta ka ardhur pak shpejt. Por fakti se kanë skuadra që akoma nuk janë ndërtuar përfundimisht mund të përdoret si justifikim në rast humbjeje..”.
