Gjykata e Krimeve të Rënda ka dhënë masën e sigurisë ‘arrest me burg’ për Selman Aliajn, djalin që vrau babain në Shkozë ditën e shtunë.
Para togave të zeza, Prokuroria ka lexuar dëshminë e Selman Aliajt dhënë para hetuesve. Djali ka treguar detaje të tjera shokuese të ngjarjes. Sipas tij, pasi e transferoi trupin e të atit në liqenin Farkës, kuptoi se ishte akoma gjallë dhe e goditi përsëri.
“Kur e çova në Farkë, kuptova që ishte gjallë dhe e godita prapë. Mora makinën e vëllait dhe shkova në Kukës, më telefonuan nga familja dhe pastaj më kapi policia”, thuhet në dëshminë e djalit.
Pas seancës gjyqësore, avokati i tij mbrojtës tha për gazetarët se do të kërkojnë të kryhet një akt ekspertimi ndaj djalit Selman Alija për të provuar nëse vuan nga probleme mendore.
“Ne mendojmë që do ketë probleme mendore, do jetë një akt ekspertimi i ngritur nga organi i Prokurorisë me ekspertë ligjorë për të përcaktuar shkallët e përgjegjshmërisë së tij”, u shpreh avokati.
Gjykata e Krimeve të Rënda pranoi kërkesën e avokatit për të kryer ekspertizën e gjendjes mendore.
a.ç
