Nuk është një moment i lumtur për të qenë anëtar i Gjykatës Kushtetuese. Sidomos kur ke dërguar një ligj në Komisionin e Venecias me shpresën që ta bllokosh dhe ke marrë prej andej jo vetëm përgjigjen që ligji është në rregull, por edhe që ti, anëtari i Kushtetueses, duhet të jesh subjekt i vetë ligjit.
Përgjigja e shumëpritur për Vetingun shqiptar erdhi nga Venecia dhe lajmet e shumta që parashihnin aprovimin e tij nga Komsioni i Venecias dolën të vërteta. Tashmë topi kalon ekskluzivisht në fushën e Gjykatës Kushtetuese, e cila duhet të marrë vendimin për heqjen e pezullimit mbi ligjin e Vetingut, pas “këshillës miqësore” të Venecias. Njëherësh kjo gjykatë ka barrën që t’i japë verë vizën edhe padive të ndryshme që kanë ngritur për Vetingun gjyqtarët dhe opozita. Përgjigja nga Venecia nuk le më shteg për oponencë ndaj ligjit.
Mund të supozohet se një kapak i rëndë është vendosur me përgjigjen nga Venecia, mbi planet për ta vonuar edhe më zbatimin e reformës në drejtësi. Presioni i shtuar ndërkombëtar, deklaratat e hapura nga Brukseli, të cilat kushtëzojnë integrimin e vendit me shbllokimin e reformës, si dhe përgjigja e fundit autoritare e ekspertëve të Komisionit të Venecias, duken si një verdikt i paapelueshëm për fillimin e zbatimit të reformës.
Në fakt ky është një verdikt që ecën paralelisht në dy korsi: në atë politike e diplomatike, si dhe në korsinë juridike. Paketa kushtetuese e reformës në drejtësi ka sot një vullnet të qartë politik të qeverisë shqiptare dhe të të gjithë faktorit relevant ndërkombëtar, të mbështetur nga një asistencë shumëplanëshe juridike shqiptare dhe e huaj, e cila i gjen me vend dhe konform Kushtetutës shqiptare, kriteret dhe pjesët përbërëse të reformës.
Në këto kushte, opozitës dhe një pjese të sistemit të drejtësisë që do të donin të pengonin vënien në lëvizje të aparatit të ri të reformës, u mbetet pak ose aspak hapësirë për të vijuar me veprime obstruksioniste. Pas rënies edhe të debatit qesharak mbi përkthimin e Vetingut, është e paqartë se cilat mund të levizjet e mëtejshme të politikës, të cilat mund të përpiqen të sugjestionojnë edhe për ca kohë gjykatën kushtetuese. Një organ i lartë i këtij shteti mbi të cilin janë drejtuar sot sytë dhe vëmendja e opinionit publik shqiptar, për vendimin që do të marrë pas përgjigjes nga Venecia.
Skënder Minxhozi
