Vendosja e katalizatorit në automjete nuk do të ishte zgjidhje për uljen e nivelit të ndotjes në vendin tonë, por qeveria mund t’i jepte zgjidhje kësaj situate duke kontrolluar me rigorozitet cilësinë e lëndëve djegëse, të cilat janë shkaktaret kryesorë për ndotjen e mjedisit.
Deklarata është bërë nga inxhinierja e licencuar e mjedisit në Durrës, Emirjana Vata, e cila ka njëkohësisht edhe diplomën e kimistes.
Ekspertja e mjedisit pranon ndotjen alarmante në ajrit në vendin tonë, por kërkon që për ta reduktuar si fillim duhet të merren masa për cilësinë e karburantit.
Vata: Nëse qeveria është vërtetë e vendosur për të ulur ndotjen që i bëhet ajrit, duhet të merret si fillim me cilësinë e karburanteve. Kjo është një nismë nuk do rëndonte në xhepat e shqiptarëve, siç do të rëndojë ky draft që ka qeveria shqiptare. Vendosja e katalizatorëve ka një kosto të lartë për xhepat tanë sepse varion nga 300 në 1 mijë euro, në varësi të vjetërsisë së makinave.
Inxhinierja e mjedisit, pohon se nisma për vendosjen e katalizatorëve tek automjetet në funksion të uljes së nivelit të ndotjes së mjedisit, duhet të bëhet gradualisht, në një afat të gjatë, dhe qytetarëve t’u mundësohet dhe blerja online e pajisjes, ku mund të shpenzojnë më pak.
Vata: Janë të nevojshme masat për ta ulur këtë ndotje. Kjo nuk është nisma më e mirë për këtë. Nëse do bëhet, duhet të bëhet gradualisht. Që nuk lejohen të blihen online që kanë një kosto më të ulët, por duhet të shkojnë ta blejnë në një servis të caktuar ngaa qeveria.
Së shpejti pritet që në qeveri të mbërrijë nisma ligjore për ndalimin e qarkullimit të automjeteve të prodhuara para vitit 2000, në rast se nuk kanë të instaluar katalizatorin, pajisjen që kushton nga 300 në 1000 euro. /oranews/a.k
