Presidenti, Bujar Nishani dhe PD kanë marrë një goditje të fortë sa i përket pretendimeve të tyre, lidhur me Ligjin e Pronave. Kreu i shtetit duke i bërë jehonë pretendimeve të PD-së e ankimoi ligjin në fjalë në Gjykatën Kushtetuese, duke rrezikuar seriozisht që të fuste vendin në një siprale të fortë krize jo vetëm me pasoja në raportet brenda vendit, por edhe në planin ekonomik. Edhe PD-ja në unison me kreun e shtetit e çoi ligjin mnë Gjykatën Kushtetuese, duke dëshmuar se kishte një rakordim të plotë mes pretendimeve të kreut të shtetit dhe PD-së. Gjykata Kushtetuese përpara se të shprehej me vendim e dërgoi çështjen për opinion në Komisionin e Venecias. Komisioni mësohet se ka vlerësuar pozitivisht ligjin e ri për Trajtimin e Pronës. Lajmin e ka bërë të ditur ministri i Drejtësisë, Ylli Manjani, përmes një statusi në rrjetin social Twitter. Manjani thotë se argumentet për ligjin janë të plota. Sipas tij, pas marrjes së “Ok”-it nga Komisioni i Venecias, do të vijojë zbatimi i ligjit.
“Komisioni i Venecias dha vlerësim 100% pozitiv për ligjin e Pronave. Argumentat janë të plota dhe shterruese! Vazhdojmë zbatimin e ligjit!”, shkruan Manjani në Twitter.
Ligji “Për trajtimin e pronës dhe përfundimin e procesit të kompensimit të pronave” u miratua një vit më parë. Ligji i pronave u ankimua në Gjykatën Kushtetuese nga 8 subjekte përfshirë dhe Presidentin Nishani, Partinë Demokratike dhe Shoqatën e Pronarëve, duke pretenduar se ligji cënonte të drejtat dhe sigurinë e pronarëve. Kushtetuesja rrëzoi kërkesën për pezullimin e menjëhershëm të efekteve të ligjit, ndërsa iu drejtua Komisionit të Venecias për opinion përpara se të jepte verdiktin përundimtar.
8 subjektet që kërkuan antikushtetueshmërinë e ligjit thanë se ai shkel rëndë të drejtat e pronarëve. Akuzat e tyre u përqëndruan kryesisht te fomula e kompensimit, e cila parashikon llogaritjen e çmimit të tokës me vlerën që ka pasur në vitin 1945. Një pikë tjetër e akuzave ka të bëjë me faktin se në ligjin e ri është hequr koncepti i kthimit të pronave, në rastin ku ato janë të lira. Sipas tyre, formula e propozuar nga Qeveria u kthen pronarëve vetëm një pjesë shumë të vogël të vlerës së pronës duke cënuar parimin e sigurisë juridike dhe të drejtat e garantuara me ligj.
Me. Ar
